سولر پاور: سب سے بڑے مسئلے — نیٹ میٹرنگ — پر قابو پانا ضروری

قومی اسمبلی کی قائمہ کمیٹی برائے خزانہ نے درآمدی سولر پینلز پر تجویز کردہ 18 فیصد سیلز ٹیکس کو متفقہ طور پر مسترد کر دیا ہے۔ لیکن کیا کہانی یہیں ختم ہو جاتی ہے — یا یہ محض آغاز ہے؟

جب رواں ماہ کے آغاز میں بجٹ کا اعلان کیا گیا تو حکومت نے ٹیکس چھوٹ ختم کرنے کے نام پر نئے ٹیکس عائد کرنے کی بھرپور کوشش کی۔ ایک پریس کانفرنس میں، جہاں وزیرِ خزانہ محمد اورنگزیب بھی موجود تھے، فیڈرل بورڈ آف ریونیو (ایف بی آر) کے چیئرمین راشد محمود لنگڑیال نے اس مجوزہ سیلز ٹیکس کا دفاع کرتے ہوئے کہا کہ اس کا مقصد مقامی سولر پینل بنانے والوں اور درآمدی پینلز کے درمیان مساوی مواقع فراہم کرنا ہے۔

انہوں نے مزید وضاحت کی کہ پاکستان بتدریج ٹیکس چھوٹ کے خاتمے کی جانب بڑھ رہا ہے — جو انٹرنیشنل مانیٹری فنڈ (آئی ایم ایف) کے پروگرام کی ایک اہم شرط ہے — اور اب چھوٹ کو توسیع دینے کا وقت نہیں۔ بظاہر یہ سب کچھ درست محسوس ہوتا ہے۔ لیکن اب ایک یوٹرن لیا جا چکا ہے۔ فی الحال اس تبدیلی کو ایک طرف رکھتے ہیں۔ ایک زیادہ اہم مسئلہ سامنے آ رہا ہے: نیٹ میٹرنگ قوانین میں اصلاحات کی رفتار نہایت سست ہے۔

بجلی کے استعمال اور خریداری (آف ٹیک) میں کمی آئی ہے — جو بلند نرخوں اور چھتوں پر سولر پینلز کے بڑھتے ہوئے استعمال کی وجہ سے ہے۔ درآمدی سولر پینلز پر 18 فیصد سیلز ٹیکس عائد کرنے کی کوشش اگرچہ سمت کے اعتبار سے درست تھی، لیکن اس سے سولر اپنائے جانے کی رفتار میں کوئی خاص کمی آنے کا امکان نہیں تھا۔ صرف سال 2024 میں، درآمد شدہ سولر پینلز نے مجموعی طور پر 17 گیگاواٹ بجلی کی پیداواری صلاحیت کا اضافہ کیا — جو پاکستان کی کل نصب شدہ بجلی کی صلاحیت (تقریباً 46 گیگاواٹ) کا ایک تہائی سے بھی زائد ہے۔

یہاں تک کہ اگر یہ ٹیکس عائد بھی ہو جاتا، تب بھی سولر کا فروغ غالباً جاری رہتا۔ زیادہ سے زیادہ یہ ٹیکس حکومت کو معمولی سی آمدنی فراہم کرتا۔ بدترین صورت میں، یہ زیادہ لین دین کو غیر رسمی مارکیٹوں کی طرف دھکیل دیتا اور اسمگلنگ کو فروغ دیتا۔ لہٰذا اگرچہ اس ٹیکس کی نیت درست تھی، اس کی سمت غلط تھی۔

اصل پالیسی توجہ نیٹ میٹرنگ پر ہونی چاہیے۔

وزیرِ توانائی اور اقتصادی رابطہ کمیٹی (ای سی سی) کی جانب سے نیٹ میٹرنگ کے بائی بیک ریٹ پر نظرِثانی کے اعلان کا کیا بنا؟ وہ فیصلہ کابینہ کی سطح پر جا کر رک گیا۔ کیوں؟

یہ جاننا اہم ہے کہ گرِڈ پر کون باقی بچا ہے؟ زیادہ تر وہ لوگ جن کے لیے گھروں کو سولر پر منتقل کرنا ممکن نہیں۔ نیٹ میٹرنگ کی خوبصورت تصویر کے پیچھے ایک ایسا پالیسی ڈھانچہ چھپا ہوا ہے جو بتدریج بااثر طبقے کے مفادات کا اسیر بنتا جا رہا ہے۔ موجودہ پالیسی ایسے صارفین پر غیر منصفانہ بوجھ ڈالتی ہے جو سولر سسٹمز نصب کرنے کی استطاعت نہیں رکھتے، جس کے نتیجے میں بجلی کے نرخ بڑھتے ہیں اور توانائی کے شعبے کی طویل مدتی پائیداری کو نقصان پہنچتا ہے۔

نیٹ میٹرنگ اصل میں سولر کے فروغ کے لیے متعارف کرائی گئی تھی تاکہ صارفین کو یہ سہولت دی جا سکے کہ وہ اضافی بجلی گرِڈ کو فروخت کر سکیں — اور وہ بھی پرکشش نرخ، یعنی فی یونٹ 27 روپے پر۔ بظاہر یہ نظام تمام فریقین کے لیے فائدہ مند تھا۔

لیکن اس میں ایک بنیادی خامی ہے: یہ صارفین نہ صرف اپنے بل کم کرتے ہیں، بلکہ اپنی زائد بجلی — جو نہایت کم لاگت پر پیدا کی جاتی ہے — گرِڈ کو غیر حقیقی طور پر بلند نرخ پر فروخت بھی کرتے ہیں، یہاں تک کہ جب ملک میں بجلی کی گنجائش فاضل ہو اور پاور کمپنیاں مزید بجلی خریدنے کی سکت یا خواہش نہ رکھتی ہوں۔ عالمی سطح پر سولر پینلز اور تنصیب کی لاگت میں کمی کے ساتھ، سولر سسٹمز کی لاگت کی واپسی (پے بیک) کی مدت تیزی سے کم ہو رہی ہے۔

اصل مسئلے کے مرکز میں ایک بنیادی سوال ہے: جب بجلی کی کوئی طلب موجود نہ ہو تو گرڈ کو اضافی بجلی خریدنے کا پابند کیوں ہونا چاہیے؟

جیسے جیسے زیادہ سے زیادہ گھروں کی چھتوں پر سولر پینل نصب کیے جا رہے ہیں، دن کے اوقات میں بجلی کی پیداوار اکثر بجلی کے استعمال سے تجاوز کر جاتی ہے، جس کے نتیجے میں بجلی تقسیم کار کمپنیاں ایسی بجلی خریدنے پر مجبور ہو جاتی ہیں جس کی انہیں ضرورت ہی نہیں — اور وہ بھی مقررہ نرخوں پر، جو اصل مارکیٹ قیمت کی عکاسی نہیں کرتے۔

مارچ 2025 میں اقتصادی رابطہ کمیٹی (ای سی سی) نے نیٹ میٹرنگ کے تحت اضافی بجلی کی خریداری کے لیے نظرثانی شدہ ریٹ، یعنی 10 روپے فی یونٹ، کی منظوری دی۔ یہ فیصلہ نیشنل الیکٹرک پاور ریگولیٹری اتھارٹی (نیپرا) کی جانب سے حالیہ منظور شدہ گرڈ لیول سولر منصوبوں کے ساتھ ہم آہنگ تھا، جنہوں نے اب تک کی سب سے کم ٹیرف بولیاں — 8.9 روپے فی یونٹ — حاصل کیں، جو قابلِ تجدید توانائی کی اصل لاگت کی بہتر عکاسی کرتی ہیں۔

تاہم، یہ فیصلہ وفاقی کابینہ میں رک گیا۔ منظوری دینے کے بجائے کابینہ کے اراکین نے اس پر مزید ”مشاورت“ کا مطالبہ کیا، اس کی توثیق کو مؤخر کر دیا اور پاور ڈویژن کو ہدایت دی کہ وہ نظرثانی کے بعد اسے دوبارہ جمع کروائے۔

خریداری کے نرخ سے ہٹ کر، موجودہ نیٹ میٹرنگ فریم ورک میں کئی دیگر سنگین خامیاں بھی موجود ہیں۔ صارفین کو یہ اجازت ہے کہ وہ اپنے منظور شدہ لوڈ سے 1.5 گنا زیادہ صلاحیت والے سولر سسٹمز نصب کر سکتے ہیں — جس کے نتیجے میں اضافی صلاحیت نصب کی جا رہی ہے، جو گرڈ سے جڑے دیگر صارفین پر مزید دباؤ ڈالتی ہے۔ ایک تحقیق کے مطابق، چھتوں پر تیزی سے بڑھتی ہوئی یہ غیر منظم سولر تنصیب حکومت کو سالانہ 100 ارب روپے کا نقصان پہنچاتی ہے اور گرڈ سے جڑے صارفین کے لیے فی یونٹ نرخ میں 2 روپے کا اضافہ کرتی ہے۔ یہ ایک ایسا چکر پیدا کرتا ہے جس میں بڑھتے نرخ مزید لوگوں کو سولر کی طرف راغب کرتے ہیں، اور یہ رجحان مزید نرخوں کو بڑھاتا ہے — جسے ایک تحقیق نے درست طور پر ”یوٹیلیٹی ڈیتھ اسپائرل“ یعنی ”گرڈ کا موت کا چکر“ قرار دیا ہے۔

مزید برآں، نیٹ میٹرنگ اس وقت صرف اُن صارفین کے لیے دستیاب ہے جن کے پاس تھری فیز میٹر نصب ہیں۔ دلچسپ بات یہ ہے کہ اس پالیسی کے باعث کم آمدنی والے اکثر صارفین اس سہولت سے محروم رہتے ہیں، اور یوں سولر کو بجلی کی چوری اور نقصانات سے متاثرہ علاقوں میں مؤثر حل کے طور پر استعمال نہیں کیا جا سکتا۔

پاکستان توانائی اور مالیاتی پالیسی سازی کے ایک نازک موڑ پر کھڑا ہے۔ جہاں سولر کی جانب منتقلی ایک پائیدار اور خود کفیل توانائی نظام کی طرف اہم قدم ہے، وہیں موجودہ پالیسی ڈھانچہ حد سے زیادہ ایک چھوٹے اور صاحبِ حیثیت طبقے کو فائدہ پہنچا رہا ہے — جبکہ اکثریتی عوام کو ایک مسلسل بوجھ تلے دبا رہا ہے جو پہلے ہی گرڈ پر بڑھتے ہوئے دباؤ کا شکار ہے۔

نیٹ میٹرنگ کے خریداری نرخ کو معقول بنانے میں تاخیر ظاہر کرتی ہے کہ کیسے مخصوص مفادات قومی توانائی پالیسی کو اب بھی متاثر کر رہے ہیں — اکثر ایسی قیمت پر جو انصاف، برابری اور طویل مدتی پائیداری کے اصولوں کے منافی ہے۔ جیسے جیسے کیپیسٹی پیمنٹس کا بوجھ بڑھ رہا ہے اور گرڈ اپنی اہمیت پسِ پردہ پیدا ہونے والی بجلی (behind-the-meter generation) کے مقابلے میں کھو رہا ہے، ہمارا موجودہ نظام مالیاتی اور عملیاتی تباہی کے قریب تر ہوتا جا رہا ہے۔

جب حکومت مالیاتی بل 2025 کو حتمی شکل دے رہی ہے، تو فوری طور پر ایک متوازن اور شمولیتی توانائی روڈ میپ کی ضرورت ہے — ایسا خاکہ جو محض عمومی مراعات سے ہٹ کر حقیقی وقت کے گرڈ حقائق کو مدِنظر رکھتے ہوئے ہدفی اور ڈیٹا پر مبنی طریقہ کار اختیار کرے، تاکہ تمام طبقوں کو یکساں فائدہ حاصل ہو۔

جتنا زیادہ وقت یہ بگاڑ جاری رہے گا، اتنی ہی گہری یہ عدم مساوات ہوتی چلی جائے گی۔