“اکنامک سروے: کیا یہ ایک غیر جانبدارانہ جائزہ ہے؟

وفاقی وزیر خزانہ محمد اورنگزیب نے اکنامک سروے 25-2024 پر روایتی پریس کانفرنس کا آغاز کرتے ہوئے کہا کہ پاکستان کی معیشت کو عالمی معیشت کے تناظر میں دیکھا جانا چاہیے۔

تاہم زیادہ مناسب یہ ہوتا کہ پاکستان کی شرحِ نمو کا موازنہ علاقائی ممالک سے کیا جاتا — چین کی 2024 کے لیے شرحِ نمو 5 فیصد رہی، بھارت کی 2025 کے لیے 6.5 فیصد، بنگلہ دیش کی 4.2 فیصد، سری لنکا کی 5 فیصد جب کہ پاکستان کی 2024-25 کے لیے متوقع شرحِ نمو 2.68 فیصد ہے۔

یہ شرح اگرچہ بجٹ میں مقرر کردہ 3.5 فیصد سے کم کردی گئی ہے، پھر بھی ایک چیلنج بنی رہے گی کیونکہ پاکستان بیورو آف اسٹیٹسٹکس (پی بی ایس) نے پہلی سہ ماہی کی جی ڈی پی شرح 1.34 فیصد، دوسری سہ ماہی کی 1.53 فیصد تک نیچے کردی ہے جب کہ تیسری سہ ماہی (جس میں ابھی نظرثانی نہیں ہوئی) کی شرح 2.4 فیصد ہے۔

سروے میں مینوفیکچرنگ شعبے کی شرحِ نمو 4.77 فیصد بتائی گئی ہے، اگرچہ لارج اسکیل مینوفیکچرنگ کے شعبے کی بحالی سست رہی ہے تاہم یہ شرح اس حقیقت سے مطابقت نہیں رکھتی کہ رواں مالی سال جولائی تا مارچ ایل ایس ایم کی شرحِ نمو منفی 1.47 فیصد رہی جب کہ گزشتہ سال کے اسی عرصے میں یہ منفی 0.22 فیصد تھی۔

سروے نے اس صورتحال کو مثبت انداز میں پیش کرنے کی کوشش کرتے ہوئے نوٹ کیا کہ مجموعی طور پر مایوس کن کارکردگی کے باوجود یہ قابلِ ذکر ہے کہ تقریباً نصف ایل ایس ایم نے مثبت نمو کا مظاہرہ کیا جن میں ملبوسات سازی، ٹیکسٹائل، کوک اور پیٹرولیم مصنوعات، دواسازی اور آٹوموبائل کی صنعتیں شامل ہیں۔

یہی امید کی جاسکتی ہے کہ یہ صنعتی ذیلی شعبوں کے ویٹیج کو تبدیل کرنے کی تمہید نہ ہو تاکہ کارکردگی کو بہتر ظاہر کیا جاسکے، جیسا کہ اس وقت دیکھنے میں آیا تھا جب ڈاکٹر حفیظ شیخ نے بطور وزیرِخزانہ مہنگائی کی شرح کے حساب میں خوراک کے ویٹیج کو کم کردیا تھا جس کے نتیجے میں مہنگائی کی شرح یک دم نصف ہوگئی تھی۔

محمد اورنگزیب نے بجا طور پر مؤقف اختیار کیا کہ افراط زر میں ڈرامائی کمی آئی ہے۔ ہمیں یقین ہے کہ وہ اس بنیادی معاشی اصول سے آگاہ ہوں گے کہ صنعت کے پہیوں کو چلانے کے لیے 2 فیصد افراط زر ناگزیر ہوتا ہے (جیسا کہ امریکی فیڈرل ریزرو کے مطالعوں سے ثابت ہے)۔

خوراک کی مہنگائی میں نمایاں کمی کی بڑی وجہ گندم کی قیمتوں میں غیر معمولی گراوٹ بنی۔ یہ کمی اس وقت دیکھنے میں آئی جب بین الاقوامی مالیاتی فنڈ (آئی ایم ایف) نے صوبائی اور وفاقی حکومتوں کو گندم کی خریداری اور اس کی امدادی قیمت مقرر کرنے سے روک دیا۔ نتیجتاً یہ خدشہ بڑھ گیا ہے کہ کسان آئندہ سیزن میں زیادہ منافع بخش فصلوں کی طرف رخ کریں گے، جس سے ملکی سطح پر گندم کی قلت پیدا ہو سکتی ہے اور درآمدات کا در کھل سکتا ہے۔

اقتصادی جائزے میں حیران کن طور پر روزگار اور بے روزگاری کی شرح کا حوالہ نہیں دیا گیا اور جو اعداد و شمار پیش کیے گئے ہیں وہ بھی 2020-21 کے پرانے ہیں۔ دوسری جانب ”آبادی، لیبر فورس اور روزگار“ کے حصے میں پالیسی ترجیحات پر تفصیل سے روشنی ڈالی گئی ہے جن میں ”صنفی راہ اور پائیداری“، وزیرِاعظم کا خواتین بااختیاری پیکیج 2024، مہارتوں کی ترقی اور روزگار کے مواقع پیدا کرنے کے اقدامات، وزیرِاعظم کے نئے اقدامات، وزیرِاعظم یوتھ پروگرام، اور سبز و ڈیجیٹل تبدیلیوں میں مستقبل کے روزگار کے امکانات شامل ہیں۔ تاہم بیرونِ ملک روزگار کے حوالے سے بھی ایک حصہ شامل ہے، مگر یہاں بھی مجموعی اعداد و شمار 1972 سے جمع کیے گئے ہیں اور 2024-25 کے دوران بیرونِ ملک کام کرنے والے پاکستانیوں کی درست تعداد واضح طور پر بیان نہیں کی گئی۔

اقتصادی جائزہ نہایت تشویشناک حقیقت کی نشاندہی کرتا ہے کہ مالی شعبے سے 1.6 ارب ڈالر کی خالص رقم بیرونِ ملک چلی گئی، جس کی بنیادی وجہ حکومتی قرضوں کی بڑھتی ہوئی واپسی اور خالص واجبات میں کمی رہی۔ سادہ الفاظ میں، مالی کھاتہ اس وقت بھی سنگین دباؤ کا شکار ہے، جس کے باعث آئندہ مالی سال میں مزید بڑے قرضے لینے اور موجودہ قرضوں کی مدت میں توسیع (رول اوور) ناگزیر دکھائی دیتی ہے۔

رواں مالی سال (جولائی تا مارچ ) کل اخراجات بڑھ کر 16.337 کھرب روپے تک جا پہنچے جو گزشتہ سال کے اسی عرصے میں 13.682 کھرب روپے تھے — یوں مجموعی طور پر 19.4 فیصد کا اضافہ ہوا۔ اقتصادی سروے کے مطابق موجودہ اخراجات میں 18.3 فیصد اضافہ ہوا ہے، حالانکہ قرضوں کی ادائیگی کے اخراجات میں نمایاں کمی واقع ہوئی ہے۔ اس سال قرض کی ادائیگی کے اخراجات میں صرف 16.7 فیصد اضافہ ہوا ہے، جو گزشتہ سال کے 54 فیصد اضافے کے مقابلے میں کافی کم ہے - یہ کمی ڈسکاؤنٹ ریٹ میں گراوٹ (گزشتہ سال 22 فیصد سے گھٹ کر گزشتہ ماہ 11 فیصد) کا نتیجہ ہے۔

حکومت نے رواں مالی سال 2025 کے بجٹ میں موجودہ اخراجات میں 21 فیصد اضافے کا ہدف رکھا تھا تاہم حالیہ بھارتی جارحیت، جسے پاکستان نے مؤثر انداز میں پسپا کیا، کے بعد امکان ہے کہ یہ اضافہ مقررہ 21 فیصد سے کہیں زیادہ ہو سکتا ہے۔

اقتصادی جائزے کا یہ دعویٰ کہ اخراجات میں اضافہ ترقیاتی اخراجات میں نمایاں اضافے کی وجہ سے ہوا ہے، وزارتِ منصوبہ بندی، ترقی اور خصوصی اقدامات کی ویب سائٹ پر موجود اعداد و شمار سے مطابقت نہیں رکھتا۔ مذکورہ ویب سائٹ پر منظوری شدہ رقم (جولائی تا اپریل 2025 کے دوران 894 ارب روپے) اور اصل اجرا شدہ رقم (ایس اے پی کے مطابق اصل اخراجات)، جو محض 449 ارب روپے یعنی نصف سے بھی کم ہے، کے درمیان واضح فرق موجود ہے۔

یہ امر قابلِ توجہ ہے کہ حکومتی توجہ کا محور فزیکل بنیادی ڈھانچے کی ترقی پر رہا جب کہ سماجی ترقی، خصوصاً تعلیم، کو نظرانداز کیا گیا — حالانکہ تعلیم ہی چین کے حیران کن معاشی عروج کا ایک بنیادی عنصر رہی ہے جس نے اُسے امریکی تجارتی محصولات کی دھمکیوں کے سامنے جھکنے سے محفوظ رکھا۔

پاکستان کو ماحولیاتی تبدیلی سے وابستہ کئی چیلنجز کا سامنا ہے؛ تاہم شہباز شریف کی زیرِ قیادت حکومت نے ان چیلنجز سے نمٹنے کے لیے بھرپور عزم کا مظاہرہ کیا ہے، جس کا ثبوت آئی ایم ایف کی جانب سے 1.4 ارب ڈالر کے ریزیلینس اینڈ سسٹین ایبلٹی فیسلٹی کی منظوری ہے۔

وزارتِ خزانہ کے زیرِ انتظام معاشی مشیر ونگ کی تیار کردہ جامع معاشی سروے رپورٹ، جو ایک قومی تعطیل کے موقع پر عوام کے لیے جاری کی گئی اور دستور کے مطابق بجٹ سے محض ایک روز قبل شائع ہوئی، آنے والے بجٹ کے مندرجات کے بارے میں عملاً کوئی اشارہ فراہم نہیں کرتی۔

اگرچہ اس میں شامل اعداد و شمار زیادہ تر تازہ ترین نہیں ہیں (چند استثنائی صورتوں کے سوا، جن میں اپریل تک کے تجارتی اعداد و شمار اور 27 مئی تک کے زرمبادلہ ذخائر شامل ہیں)، تاہم تجزیہ حسبِ روایت حکومت کے اُن دعوؤں کی عکاسی کرتا ہے کہ ٹیکس ٹو جی ڈی پی شرح میں اضافہ کیا گیا ہے (اگرچہ مئی کے آخر تک بجٹ شدہ خسارہ ایک کھرب روپے بتایا گیا ہے) اور بالواسطہ ٹیکسوں پر انحصار بدستور جاری ہے، جن کا بوجھ غریب طبقے پر امیر طبقے کے مقابلے میں کہیں زیادہ پڑتا ہے۔

کاپی رائٹ بزنس ریکارڈر 2025