کراچی مویشی منڈی میں ڈھائی لاکھ جانوروں کی آمد، ایک کروڑ 75 لاکھ کا جوڑا فروخت

پاکستان میں عیدالاضحیٰ کے قریب آنے کے ساتھ ہی ایشیا کی سب سے بڑی مویشی منڈی، جو کراچی کے نادرن بائی پاس پر 1,200 ایکڑ پر پھیلی ہوئی ہے، میں خریدو فروخت عروج پر ہے۔

عیدالاضحیٰ جسے عید قربان بھی کہا جاتا ہے، اسلامی کیلنڈر کے آخری مہینے میں دنیا بھر کے مسلمان ہر سال مناتے ہیں۔ اس سال پاکستان میں عیدالاضحیٰ کا پہلا دن ہفتہ، 7 جون کو منایا جائے گا۔

نادرن بائی پاس مویشی منڈی کے ایڈمنسٹریٹر شہاب علی اکرام نے بزنس ریکارڈر کو بتایا کہ منڈی میں اب تک تقریباً 2,50,000 جانور آ چکے ہیں، اور عید کے دوسرے دن تک یہ تعداد 3,00,000 تک پہنچنے کی توقع ہے۔

ایک اندازے کے مطابق، صرف نادرن بائی پاس کی منڈی میں اس سال 38 ارب روپے سے زائد کا کاروبار ہونے کا امکان ہے۔

جب مہنگائی اور عوام کی قوتِ خرید کے بارے میں سوال کیا گیا، تو ایڈمنسٹریٹر نے وضاحت کی کہ مویشی منڈی میں قیمتوں کا تعین خالصتاً ”بھاؤ تاؤ“ پر ہوتا ہے، اس لیے کم از کم قیمت طے کرنا مشکل ہے۔ تاہم انہوں نے بتایا کہ ایک تاجر سلیم چاچا نے جانوروں کا جوڑا ایک کروڑ 75 لاکھ روپے میں فروخت کیا، جو اب تک کی سب سے بڑی ڈیل ہے۔

شہاب علی اکرام نے مزید بتایا کہ عوامی سہولت کے پیش نظر اس سال گیٹ پاس کی فیس میں نمایاں کمی کی گئی ہے۔ کار کے لیے فیس 6,500 روپے سے کم کر کے 3,250 روپے کر دی گئی جبکہ موٹر سائیکل کے لیے فیس 3,000 روپے سے کم کر کے 1,500 روپے کر دی گئی ہے۔

انہوں نے بتایا کہ عوام کی سہولت کے لیے مختلف بینکوں کی اے ٹی ایم مشینیں بھی منڈی کے اندر نصب کر دی گئی ہیں۔

نادرن بائی پاس مویشی منڈی کے ایڈمنسٹریٹر شہاب علی اکرام نے مزید بتایا کہ منڈی کو 12 بلاکس میں تقسیم کیا گیا ہے، جن میں سندھ، پنجاب، خیبر پختونخوا، کشمیر اور سبی بلاک شامل ہیں۔

خریدار بلال شاہ نے بتایا کہ اس سال منڈی سے جانور خریدنے کے بعد باہر نکلنے کے لیے بغیر کسی فیس کے گیٹ پاس درکار ہے۔ انہوں نے کہا کہ یہ نئی سہولت خریداروں اور بیوپاریوں دونوں کے لیے معاون ثابت ہوئی ہے۔’

نادرن بائی پاس منڈی کے مستقل خریدار خواجہ عثمان سہیل نے اپنا تجربہ شیئر کرتے ہوئے بتایا کہ جانور منڈی میں اوسطاً 80,000 سے 125,000 روپے فی من (تقریباً 40 کلوگرام) کے حساب سے فروخت ہو رہے ہیں۔

انہوں نے کہا کہ اس سال منڈی میں سہولتوں میں نمایاں بہتری آئی ہے، جن میں کیش لیس بینکنگ سے لے کر فوڈ اسٹریٹس تک شامل ہیں۔

گیٹ پاس سے متعلق سہیل نے بتایا کہ اس کے حصول کے لیے گوگل فارم دستیاب ہے اور فیس میں کمی قابلِ تحسین اقدام ہے، جو منڈی کی رونق اور فعالیت میں اضافہ کرے گا۔

انہوں نے مزید کہا کہ اگرچہ نادرن بائی پاس کی مرکزی مویشی منڈی شہر کے کئی علاقوں سے کافی دور واقع ہے، تاہم شہری قربانی کے جانور دیگر چھوٹی منڈیوں اور نجی فارمز سے بھی خرید رہے ہیں۔

شہر کے مختلف علاقوں میں بڑی اور چھوٹی مویشی منڈیاں قائم کی گئی ہیں، جن میں ملیر، بھینس کالونی، لیاری، مواچھ گوٹھ، یوسف گوٹھ، اورنگی ٹاؤن، گلستانِ جوہر، نیو کراچی اور دیگر کئی علاقے شامل ہیں۔

یہ امر قابلِ ذکر ہے کہ کمشنر کراچی سید حسن نقوی نے ایک نوٹیفکیشن جاری کرتے ہوئے غیر قانونی مویشی منڈیوں اور سڑک کنارے جانوروں کی فروخت پر پابندی عائد کر دی ہے۔

ان کا کہنا تھا کہ شہری انتظامیہ منڈی کی سرگرمیوں کو منظم کرنے اور بلدیاتی قواعد و ضوابط پر عملدرآمد یقینی بنانے کے لیے سخت اقدامات کرے گی۔

انہوں نے مزید کہا کہ اب یہ رجحان تیزی سے فروغ پا رہا ہے کہ لوگ قربانی کے جانور مرکزی منڈی کے بجائے متبادل اور قریبی منڈیوں سے خریدنے کو ترجیح دے رہے ہیں کیونکہ قیمتوں میں واضح فرق نہیں پایا جاتا۔

اگرچہ ایشیا کی سب سے بڑی مویشی منڈی نے ابھی اپنی اہمیت نہیں کھوئی، تاہم یہ رجحان آئندہ برسوں میں اس پر اثر انداز ہو سکتا ہے۔