جولائی تا مئی: تمباکو صنعت سے 240 ارب روپے سے زائد ریونیو حاصل،285 ارب سے تجاوز متوقع

فیڈرل بورڈ آف ریونیو (ایف بی آر ) نے جولائی تا مئی (2024-25) تمباکو صنعت سے 240 ارب روپے سے زائد محصول جمع کیا جو جون 2025 کے آخر تک 285 ارب روپے سے تجاوز کرنے کا امکان ہے، یہ صنعت کے سرکاری محصول میں کمی کے دعووں کی تردید کرتا ہے۔

سال 2024-25 کے دوران تمباکو شعبے سے ٹیکس کی بڑھتی ہوئی وصولیاں صنعت کی ان بجٹ تجاویز کی تردید کرتی ہیں جن میں تمباکو ٹیکس میں کمی کی درخواست کی گئی تھی۔ یہ ظاہر کرتا ہے کہ تمباکو کی صنعت پالیسی کو متاثر کرنے کے لیے ٹیکس کے اعداد و شمار میں چالاکی کرتی ہے۔ موجودہ مالی سال میں 285 ارب روپے سے زائد تمباکو ٹیکس کی متوقع آمدنی گزشتہ مالی سال کے اعداد و شمار کے برابر ہے جو کہ زیادہ ٹیکس کے باوجود طلب میں استحکام کا عندیہ دیتی ہے۔

یہ اعداد و شمار پاکستان ریونیو آٹومیشن لمیٹڈ (پی آر اے ایل) کے ایف بی آر کے ڈیٹا بیس نے بھی تصدیق کیے ہیں۔

جولائی تا مئی (2024-25) ایف بی آر کی مجموعی ٹیکس وصولیوں میں زبردست کمی کے باوجود، تمباکو صنعت سے محصول کی وصولیاں بڑھوتری کا رجحان دکھا رہی ہیں، موجودہ مالی سال کے اختتام تک 285 ارب روپے کی متوقع وصولی ہے، جو بزنس ریکارڈر کے حوالے سے ایک تمباکو ملٹی نیشنل کمپنی کی تجویز کے برعکس ہے۔

سرکاری ذرائع کے مطابق، پاکستان کی تمباکو صنعت ایک بار پھر سرکاری پالیسی اور آئی ایم ایف کے مذاکرات پر اثرانداز ہونے کے لیے حقائق کو مسخ کرنے کے الزام کے تحت نگرانی میں ہے، خاص طور پر 2025-26 کے وفاقی بجٹ سے قبل۔ صنعت کے نمائندے فیڈرل ایکسائز ڈیوٹی کو 1,000 سگریٹ اسٹکس پر 5,050 روپے سے کم کر کے 3,800 روپے کرنے کا مطالبہ کر رہے ہیں، جس کا دعویٰ ہے کہ اس سے سگریٹ کی کھپت بڑھے گی اور نتیجتاً ٹیکس وصولی میں اضافہ ہوگا۔

تاہم دستیاب اعداد و شمار ان دعوؤں کی تردید کرتے ہیں۔ 15 مئی 2025 تک تمباکو سے حاصل شدہ ٹیکس محصولات پہلے ہی 240 ارب روپے تک پہنچ چکے ہیں اور اندازے کے مطابق جون کے آخر تک یہ رقم 285 ارب روپے سے تجاوز کر جائے گی۔ یہ پچھلے مالی سال کے اعداد و شمار کے برابر ہے، جو کہ سخت ٹیکس کے باوجود طلب میں استحکام کو ظاہر کرتا ہے۔

صنعت کی کہانی کو مزید پیچیدہ اور گمراہ کن بنانے کے لیے غیر قانونی سگریٹ کی تجارت کے حجم کو بار بار بڑھا چڑھا کر پیش کیا جاتا ہے۔ حال ہی میں انسٹی ٹیوٹ فار پبلک آپینین ریسرچ کے ایک سروے میں دعویٰ کیا گیا کہ 54 فیصد سگریٹ برانڈز ٹیکس اسٹامپ اور گرافک وارننگز کی غیر موجودگی کی بنیاد پر غیر قانونی سمجھے جاتے ہیں۔ تاہم، اس سروے نے ان برانڈز کے حقیقی مارکیٹ شیئر یا استعمال کو نظرانداز کر دیا جس کی وجہ سے پیش کردہ اعداد و شمار گمراہ کن اور غیر مستند ثابت ہوئے۔

سب سے زیادہ مارکیٹ شیئر رکھنے والے غیر قانونی سگریٹ برانڈز اس وقت ہر پیکٹ 180 سے 240 روپے کے درمیان فروخت ہو رہے ہیں۔ اس لیے تمباکو پر ٹیکس میں کمی سے ٹیکس شدہ مصنوعات کی فروخت میں اضافہ ممکن نہیں ہوگا، اور غیر قانونی تجارت کو کم کرنے کا واحد راستہ سخت نگرانی اور مؤثر ٹریک اینڈ ٹریس نظام کا نفاذ ہے۔

کم ٹیکس لگانے کو آمدنی بڑھانے کا حل قرار دینے کی کوششوں کے باوجود، اعداد و شمار اس کے برعکس بات کرتے ہیں۔ماہرین کے مطابق ٹیکس کم کرنے سے قیمتیں گھٹ سکتی ہیں اور سگریٹ کی دستیابی بڑھ سکتی ہے، جس کے نتیجے میں تمباکو نوشی میں اضافہ ہو سکتا ہے، مگر اس سے لازمی طور پر ٹیکس کی وصولی میں بہتری نہیں آئے گی ۔

کاپی رائٹ بزنس ریکارڈر 2025