پہلگام میں سیاحوں پر حملے کے بعد بڑھتی ہوئی کشیدگی کے دوران متحدہ عرب امارات (یو اے ای) اور کویت کی قیادت نے پاکستان پر زور دیا ہے کہ وہ زیادہ سے زیادہ احتیاط برتے اور بھارت کے ساتھ تمام حل طلب مسائل کو بامعنی مذاکرات کے ذریعے حل کرے۔
کویت کے وزیر خارجہ عبداللہ علی الیہیا نے پاکستان کے ساتھ گہرے اور برادرانہ تعلقات کا اعادہ کرتے ہوئے اس نازک وقت میں پاکستان کو اپنے مکمل تعاون کا یقین دلایا۔
پہلگام میں گزشتہ ہفتے نامعلوم حملہ آوروں کے حملے میں کم از کم 26 سیاحوں کی ہلاکت کے بعد بھارت اور پاکستان کے درمیان کشیدگی میں اضافہ ہوگیا تھا۔ اس حملے کے بعد بھارت نے پاکستان کے تین دریاؤں کو پانی کی فراہمی روکنے کے لیے سندھ طاس معاہدہ معطل کر دیا۔
دفتر خارجہ کے ترجمان نے بتایا کہ نائب وزیر اعظم/وزیر خارجہ سینیٹر محمد اسحاق ڈار نے متحدہ عرب امارات کے نائب وزیر اعظم اور وزیر خارجہ شیخ عبداللہ بن زاید آل نہیان سے فون پر بات کی۔ دونوں رہنماؤں نے حالیہ علاقائی صورتحال اور باہمی دلچسپی کے معاملات پر تفصیل سے تبادلہ خیال کیا۔
یو اے ای کے وزیر خارجہ نے خطے میں استحکام کو برقرار رکھنے، بات چیت کو فروغ دینے، احتیاط برتنے اور تنازعات کے پرامن حل پر زور دیا۔
اسی دوران، وزیر خارجہ کویت عبداللہ علی الیہیا نے بھی وزیر خارجہ پاکستان سے ٹیلی فون پر بات کی اور پاکستان کو مکمل حمایت کا یقین دلایا۔
اس کے علاوہ،اسحاق ڈار نے ہنگری کے وزیر خارجہ پیٹر سیزجارٹو سے بھی ٹیلی فون پر بات کی، جس میں بھارت کے بلاجواز پروپیگنڈہ اور یکطرفہ غیر قانونی اقدامات کو مسترد کیا گیا۔ سیزجارٹو نے تناؤ کو کم کرنے کے لیے بات چیت اور مسائل کے پرامن حل کی اہمیت پر زور دیا۔
کاپی رائٹ بزنس ریکارڈر، 2025
Comments
Comments are closed.