متحدہ عرب امارات کے نائب وزیر اعظم و وزیر خارجہ شیخ عبداللہ بن زاید النہیان اتوار کے روز پاکستان کے دو روزہ سرکاری دورے پر اسلام آباد پہنچ گئے، جس کا مقصد دونوں ممالک کے درمیان معاشی اور اسٹرٹیجک تعاون کو فروغ دینا ہے۔
دفتر خارجہ کے مطابق، اپنے قیام کے دوران شیخ عبداللہ کی ملاقات نائب وزیر اعظم و وزیر خارجہ اسحاق ڈار سے متوقع ہے، جس میں تجارت، سرمایہ کاری، توانائی کے شعبے میں تعاون، اور علاقائی سلامتی سے متعلق امور زیر بحث آئیں گے۔
شیخ عبداللہ کی وزیر اعظم شہباز شریف سے بھی ملاقات متوقع ہے۔ دفتر خارجہ کے بیان کے مطابق، یہ دورہ دونوں ممالک کے درمیان باہمی دلچسپی کے تمام شعبوں میں تعاون کو مضبوط بنانے کی مشترکہ خواہش کی عکاسی کرتا ہے۔
متحدہ عرب امارات، خلیجی خطے میں پاکستان کا سب سے بڑا تجارتی شراکت دار ہے۔ حکام کے مطابق، یہ دورہ دونوں ممالک کے درمیان اقتصادی شراکت داری اور اسٹرٹیجک ہم آہنگی کے نئے امکانات تلاش کرنے میں مددگار ثابت ہوگا۔
حالیہ مہینوں میں پاکستان اور یو اے ای کے درمیان اقتصادی تعاون میں اضافہ دیکھنے میں آئی ہے۔ فروری میں ابو ظہبی کے ولی عہد کے دورہ پاکستان کے دوران دونوں ممالک نے معدنیات، بینکاری، ریلوے اور انفراسٹرکچر سمیت مختلف شعبوں میں کئی معاہدوں پر دستخط کیے۔
گزشتہ سال جنوری میں بھی دونوں ممالک کے درمیان ریلویز، اکنامک زونز اور بڑے پیمانے پر بنیادی ڈھانچے کے منصوبوں سے متعلق 3 ارب ڈالر سے زائد کے معاہدے طے پائے تھے۔
دفتر خارجہ کے مطابق موجودہ دورے کے دوران علاقائی اور عالمی امور پر بھی بات چیت کی جائے گی۔ یو اے ای کے نائب وزیر اعظم کا استقبال ایئرپورٹ پر وزیر خارجہ اسحاق ڈار نے کیا۔
کاپی رائٹ بزنس ریکارڈر، 2025
Comments
Comments are closed.