فیصل بینک کے اسپانسر اتمار اور جی ایف ایچ گروپ کے درمیان ڈیل ختم

فیصل بینک لمیٹڈ (ایف بی ایل) کے اسپانسر شیئر ہولڈر اتمار ہولڈنگ اور جی ایف ایچ فنانشل گروپ کے درمیان اتمار کے فنانسنگ اور سرمایہ کاری پورٹ فولیو کے ممکنہ حصول سے متعلق مذاکرات ختم ہو گئے ہیں۔

فیصل بینک لمیٹڈ نے بدھ کے روز پاکستان اسٹاک ایکسچینج کو جمع کرائے گئے ایک نوٹس میں اس پیش رفت سے آگاہ کیا۔

نوٹس میں کہا گیا کہ ہم آپ کو مطلع کرنا چاہتے ہیں کہ تفصیلی بات چیت کے بعد، اتمار ہولڈنگ بی ایس سی، جو فیصل بینک لمیٹڈ کا اسپانسر شیئر ہولڈر ہے، اور جی ایف ایچ فنانشل گروپ بی ایس سی نے باہمی رضامندی سے اتمار کے فنانسنگ اور سرمایہ کاری پورٹ فولیو کے ممکنہ حصول سے متعلق مذاکرات ختم کرنے پر اتفاق کیا ہے۔

نوٹس میں مزید کہا گیا کہ اس معاملے سے متعلق کوئی اور اہم پہلو فی الوقت بتانے کے قابل نہیں۔ بورڈ آف ڈائریکٹرز نے ان معلومات کے اجرا کی اجازت دی ہے۔

جی ایف ایچ فنانشل گروپ خلیجی تعاون کونسل کے خطے میں ایک معروف مالیاتی ادارہ ہے، جس کا صدر دفتر بحرین میں واقع ہے۔ یہ ادارہ چار جی سی سی اسٹاک ایکسچینجز (بحرین بورس، بورصہ کویت، دبئی فنانشل مارکیٹ، اور ابوظہبی سیکیورٹیز ایکسچینج) پر لسٹڈ ہے۔

مئی 2024 میں، فیصل بینک نے اعلان کیا تھا کہ اتمار ہولڈنگ نے اپنے شیئر ہولڈرز کی منظوری کے لیے غیر معمولی جنرل میٹنگز (ای او جی ایم) کا انعقاد کیا، تاکہ مخصوص اثاثوں کی فروخت اور منتقلی کے لیے منظوری حاصل کی جا سکے۔

کمپنی نے شیئر ہولڈرز کی منظوری حاصل کر لی تھی، جس کے تحت تقریباً 695 سے 715 ملین ڈالر کے اثاثے اور 665 سے 695 ملین ڈالر کے واجبات فروخت اور منتقل کیے جانے تھے۔

ای او جی ایم کے ایجنڈا آئٹمز میں سے ایک یہ بھی تھا کہ اتمار اپنی موجودہ فیصل بینک میں 75 فیصد حصص (یعنی فیصل بینک کے کل جاری کردہ حصص کا تقریباً 50 فیصد اور کنٹرولنگ انٹرسٹ) جی ایف ایچ یا اس کی کسی ذیلی کمپنی یا نامزد ادارے کو فروخت یا منتقل کرے گا۔

یہ مجوزہ لین دین تمام ضروری ریگولیٹری منظوریوں اور پاکستان، بحرین اور دیگر متعلقہ خطوں کے تمام قانونی تقاضوں کی تکمیل سے مشروط تھا۔