گوادَر سے چین کو گدھے کے گوشت کی برآمدات تجارت کو فروغ دیں گی، رانا تنویر حسین

وفاقی وزیر رانا تنویر حسین نے اعلان کیا ہے کہ گوادر فارمز سے چین کو گدھے کے گوشت کی تجارتی بنیاد پر ترسیل کے ذریعے پاکستان کی برآمدات میں اضافہ ہوگا۔

وفاقی وزیر نے ہفتے کے روز چین کی گدھے کی صنعت کے نائب صدر زاہو فی کی سربراہی میں ایک اعلیٰ سطح کے چینی وفد سے ملاقات کی جس میں گوادر میں گدھوں کی افزائش اور پروسیسنگ کی تجارتی سہولیات کے قیام کے منصوبوں پر تبادلہ خیال کیا گیا۔

انہوں نے کہا کہ چین کو گدھے کا گوشت برآمد کرنے سے پاکستان کی برآمدات میں مدد ملے گی۔

مذاکرات کے دوران چینی وفد نے کہا کہ پاکستان میں گدھوں کی افزائش نسل کے لیے سازگار ماحول موجود ہے۔

وفاقی وزیر نے اس بات کی تصدیق کی کہ اگرچہ یہ منصوبہ آگے بڑھے گا لیکن سخت قواعد و ضوابط گدھے کے مقامی نسل کے تحفظ کو یقینی بنائیں گے۔

انہوں نے کہا کہ گدھے کے فارم قائم کرنے کی اجازت تمام قانونی تقاضے پورے کرنے کے بعد ہی دی جائے گی۔

انہوں نے واضح کیا کہ اس اقدام سے مقامی گدھوں کی نسلوں کی افزائش پر منفی اثر نہیں پڑے گا۔

وفاقی وزیر نے انکشاف کیا کہ چین کی گدھے کی صنعت کو گوادر کے ایکسپورٹ پروسیسنگ زون میں فارم قائم کرنے کی اجازت دی جائے گی، جس میں گدھے ذبح اور ان کا گوشت برآمد کرنے کی سہولیات ہوں گی۔

اس بنیادی پیشرفت سے چین کو پاکستان کی گوشت کی برآمدات میں نمایاں اضافہ متوقع ہے۔

اس منصوبے سے پاکستان اور چین کے درمیان تجارتی تعلقات میں مزید بہتری آئے گی جبکہ روزگار کے نئے مواقع پیدا ہوں گے۔