پاور جنریشن میں مسائل برقرار

اکتوبر 2024 میں 10 ارب یونٹس کی بجلی کی پیداوار نے طلب میں بہتری کے اشارے دیے ہیں حالانکہ اس میں کچھ خامیاں بھی موجود ہیں۔یقیناً، بجلی کی پیداوار میں سالانہ تقریباً 8 فیصد کا اضافہ، جو کہ پچھلے 14 ماہ میں سب سے بڑا اضافہ ہے، خوشی کا باعث ہے۔ لیکن یہ بات نظرانداز نہیں کی جانی چاہیے کہ یہ اضافہ گزشتہ سال کے اسی مہینے میں دہرے ہندسے کی کمی کے بعد آیا ہے، جو اُس وقت 8 سال کی سب سے کم سطح تھی۔

مجموعی طور پر رواں مالی سال کے پہلے چار ماہ کے دوران گرڈ پاور کی پیداوار 49 ارب یونٹس رہی ہے جو کہ سالانہ 5 فیصد کم ہے اور یہ پچھلے 6 سال میں سب سے کم ہے۔ اس سے قبل مالی سال 2019 کے پہلے چار ماہ میں سب سے کم سطح رپورٹ کی گئی تھی۔ یہ لگاتار تیسرا سال ہے جب چوتھے ماہ پیداوار میں سالانہ منفی ترقی دیکھی جارہی ہے، اور یہ واضح طور پر ہمیں بتاتا ہے کہ صرف اکتوبر میں ہونے والی بہتری پر خوش ہونے کی زیادہ وجہ نہیں ہے۔ رواں مالی سال کے پہلے 4 ماہ کی پیداوار مالی سال 22 کی بلند ترین سطح سے 11 فیصد کم ہے اور 12 ماہ کی رولنگ بنیاد پر سالانہ 5.6 فیصد کم ہے۔ یہ بات ذہن میں رکھیں کہ ستمبر 2018 میں 12 ماہ کا متحرک اوسط 10 ارب یونٹس تھا، جو کہ سات سال پہلے کی بات ہے۔

یاد رکھیں کہ اکتوبر 2024 سب سے گرم اکتوبر رہا جس میں اوسط درجہ حرارت سے 2.48 ڈگری سیلسیس (10.5فیصد) کا بڑا انحراف تھا۔ پاکستان کے محکمہ موسمیات کے مطابق مختلف علاقوں میں اوسط، درمیانہ اور دن کے اوقات میں درجہ حرارت پچھلے تمام اکتوبر کے مقابلے میں سب سے زیادہ ریکارڈ کیے گئے۔ جہاں درجہ حرارت طویل مدتی اوسط سے 10.5 فیصد زیادہ رہا، وہاں سالانہ 8 فیصد کا اضافہ اتنا حوصلہ افزا نہیں لگتا۔

اکتوبر 2024 میں ایک نادر واقعہ پیش آیا، جب اصل ماہانہ بجلی کی پیداوار ریفرنس پیداوار سے ایک فیصد زیادہ رہی۔ اس میں کہا گیا کہ مالی سال 2025 کے 4 ماہ کی پیداوار اب بھی 54 ارب یونٹس کے ریفرنس جنریشن سے 9 فیصد کم ہے، جو پاور پرچیز پرائس کے حسابات کے لیے کام کی گئی تھی۔ حالیہ رجحان کے مطابق، ماہانہ فیول چارجز ایڈجسٹمنٹ (ایف سی اے) کی درخواست منفی زون میں رہی۔ منفی 1.02 روپے فی یونٹ پر یہ درخواست تقریباً دو سال میں سب سے کم ماہانہ ایڈجسٹمنٹ ہے۔ زیادہ حقیقت پسندانہ ریفرنس جنریشن مکس نے نچلی سطح پر ایڈجسٹمنٹ برقرار رکھنے میں مدد کی ہے ، جس کے ساتھ ساتھ نمایاں طور پر مستحکم پاکستانی روپے اور بین الاقوامی توانائی اجناس کی قیمتیں بھی شامل ہیں۔

حکام نے موسم سرما کے ترغیبی پیکج کو منظوری دے دی ہے تاکہ معمولی قیمت پر 25 فیصد تک بڑھتی ہوئی کھپت کے ساتھ زیادہ کھپت کی حوصلہ افزائی کی جاسکے۔ یہ خیال قابلِ غور ہے لیکن یہ توقع نہیں کی جا رہی کہ اس سے بجلی کے استعمال کے رجحانات میں کوئی بڑی تبدیلی آئے گی، جب تک صنعتی صارفین کچھ حیران کن قدم نہ اٹھائیں۔ گرڈ پر بجلی کے استعمال میں زیادہ واضح اضافہ اس وقت متوقع ہے جب کیپٹیو پاور استعمال کرنے والے صنعتی صارفین گرڈ پر واپس آئیں گے۔ اطلاعات کے مطابق، آئی ایم ایف نے 2024 کے اختتام تک کیپٹیو پاور کے استعمال کو مکمل طور پر ختم کرنے پر سختی سے زور دیا ہے۔

چھتوں پر نصب سولر سسٹمز کے بڑے پیمانے پر استعمال نے گرڈ بجلی کی پیداوار میں نمایاں کمی کر دی ہے۔ اس کے پیش نظر، قیمتوں اور لوڈ مینجمنٹ کی حکمتِ عملی میں تبدیلی کی ضرورت ہے۔ اس کے ساتھ ساتھ، صنعتی کیپٹیو پاور صارفین کو گرڈ پر واپس لانے کی بھی کوششیں ضروری ہیں۔ گرڈ سے پیدا ہونے اور استعمال ہونے والی ہر یونٹ بجلی قومی اوسط ٹیرف کو کم کرنے میں مددگار ثابت ہوگی۔ صرف اسی صورت میں آزاد پاور پروڈیوسرز (آئی پی پی ) کے معاہدوں پر نظرثانی سے مطلوبہ نتائج حاصل کیے جا سکیں گے۔