پہلا ون ڈے: دلچسپ مقابلے کے بعد آسٹریلیا نے پاکستان کو شکست دیدی

آسٹریلیا نے پاکستان کو پہلے ایک روزہ میچ میں دلچسپ مقابلے کے بعد 2 وکٹوں سے شکست دے دی۔

آسٹریلیا کے میلبرن کرکٹ گراؤنڈ میں پاکستان اور آسٹریلیا کے درمیان تین ون ڈے میچز پر مشتمل سیریز کے ابتدائی میچ میں پہلے بیٹنگ کرتے ہوئے قومی ٹیم 46.4 اوور میں 203 رنز پر آؤٹ ہوگئی۔

کم ہدف کے باوجود پاکستانی باؤلرز کی عمدہ کارکردگی نے میچ کو دلچسپ بنادیا تاہم قومی ٹیم میچ جیتنے میں کامیاب نہ ہوسکی۔

آسٹریلیا کی جانب سے جیک فریزر میکگورک اور میتھیو شارٹ نے اننگز کا آغاز کیا، شارٹ ایک اور جیک 16 رنز بنانے کے بعد آؤٹ ہوئے۔

28 رنز پر ابتدائی 2 وکٹیں گرنے کے بعد اسٹیو اسمتھ اور جوش انگلیس نے 85 رنز کی شراکت قائم کی، جوش انگلیس 49 اور اسٹیو اسمتھ 44 رنز بناکر آؤٹ ہوئے۔

تاہم حارث رؤف سمیت دیگر باؤلرز کی عمدہ باؤلنگ کی بدولت میچ ایک بار پھر سے دلچسپ ہوگیا۔

حارث رؤف نے پہلے اسٹیو اسمتھ کو پویلین بھیجا جس کے بعد مارنس لبوشین کو 16 اور گلین میکسوئل کو کھاتہ کھولے بغیر پویلین بھیج کر آسٹریلیا کی مشکلات میں اضافہ کیا۔

ہدف کے تعاقب میں آسٹریلیا کے185 رنز پر 8 کھلاڑی آؤٹ ہوگئے۔

32ویں اوور میں فاسٹ باؤلر نسیم شاہ ان فٹ ہوکر میدان سے باہر چلےگئے ، ان کا اوور محمد حسنین نے مکمل کیا۔

آسٹریلیا نے مطلوبہ ہدف 33.3 اوورز میں 8 وکٹوں پر پورا کرلیا۔

پاکستان کی جانب سے حارث رؤف نے 3، شاہین آفریدی نے 2، محمد حسنین اور نسیم شاہ نے ایک ایک وکٹ حاصل کی۔

قبل ازیں آسٹریلیا کے کپتان پیٹ کمنز نے پاکستان کے خلاف سیریز کے پہلے میچ میں ٹاس جیت کر بولنگ کا فیصلہ کیا۔

قومی ٹیم نے بیٹنگ شروع کی تو صائم ایوب ایک رن بنا کر مچل اسٹارک کی گیند پر بولڈ ہوگئے۔ تین رنز پر پہلی وکٹ گرنے کے بعد 24 کے مجموعی اسکور پر عبداللہ شفیق بھی 12رنز بنا کر چلتے بنے۔

دو کھلاڑیوں کے آؤٹ ہونے کے بعد کپتان محمد رضوان اور بابر اعظم کے درمیان 39 رنز کی شراکت داری قائم ہوئی لیکن یہاں بابراعظم 37 رنز بنا کر ایڈم زمپا کی گیند پر بولڈ ہوگئے۔ اس کے بعد کامران غلام 5 رنز اور سلمان علی آغا 12 رنز بنا کر اپنی اپنی وکٹ گنوا بیٹھے۔

کپتان محمد رضوان 44 رنز کی اننگز کھیل کر مارنس لبوشین کی گیند پر کیچ آؤٹ ہوگئے۔ محمد رضوان کے بعد شاہین شاہ آفریدی نے جارحانہ انداز اپناتے ہوئے 3 چوکوں اور ایک چھکے کی مدد سے 19 گیندوں پر 24 رنز بنائے لیکن 148 کے مجموعی اسکور پر مچل اسٹارک کی گیند پر بولڈ ہوگئے۔

ڈیبیو کرنے والے عرفان خان 22 رنز بنا کر رن آؤٹ ہوئے جب کہ حارث رؤف صفر پر پویلین لوٹ گئے۔ نسیم شاہ نے جارحانہ اننگز کھیلتے ہوئے 4 چھکوں اور ایک چوکے کی مدد سے 39 گیندوں پر 40 رنز بنائے۔

واضح رہے کہ مچل مارش اور ٹریوس ہیڈ کی عدم موجودگی میں عالمی چیمپیئن آسٹریلیا نے جیک فریزر میک گرک اور میٹ شارٹ کی شکل میں نئی اوپننگ پارٹنرشپ قائم کی ہے۔

تجربہ کار جوش ہیزل ووڈ کو آرام دیا گیا جبکہ شان ایبٹ کو کمنز اور مچل اسٹارک کے ساتھ میزبان ٹیم کے فاسٹ اٹیک میں شامل کیا گیا ۔