صدر کا آئی پی پیز کے مسئلے کو اتفاق رائے سے حل کرنے پر زور

صدر آصف علی زرداری نے کہا کہ آئی پی پیز ایک گھمبیر مسئلہ ہے جسے تمام اسٹیک ہولڈرز کے درمیان اتفاق رائے پیدا کرکے حل کرنے کی ضرورت ہے۔

تاجر برادری کے ساتھ ایک اجلاس میں انہوں نے کاروباری رہنماؤں پر مشتمل ایک کمیٹی کی تشکیل کی تجویز پیش کی جو تنقیدی تجزیہ اور قابل عمل سفارشات پیش کرسکتی ہے۔ انہوں نے یقین دلایا کہ ان کا دفتر تمام اسٹیک ہولڈرز کے لئے فائدہ مند صورتحال پر کام کرنے کے لئے اس کمیٹی کے ساتھ مکمل تعاون کرے گا۔

فیصل آباد چیمبر آف کامرس اینڈ انڈسٹری (ایف سی سی آئی) کے صدر ڈاکٹر خرم طارق نے تاجر برادری کی نمائندگی کرتے ہوئے کہا کہ بجلی کی ناقابل برداشت قیمت کی وجہ سے صنعتی یونٹس بند ہو رہے ہیں۔

انہوں نے کہا کہ اس صورتحال سے نہ صرف بے روزگاری پیدا ہوگی بلکہ برآمدات پر بھی منفی اثرات مرتب ہوں گے، آئی پی پیز کی جانب سے بجلی کی قیمت وصول کرنے کی کوئی اخلاقی بنیاد نہیں ہے جو آئی پی پیز نے کبھی پیدا نہیں کی تھی۔

ڈاکٹر خرم نے کہا کہ بجلی کے بھاری بل ادا کرنے سے قاصر ہونے کی وجہ سے لوگ خودکشی کرنے پر مجبور ہیں۔ انہوں نے کہا کہ صدر کو لوگوں اور صنعتوں کو اس دلدل سے نکالنے کے لئے مداخلت کرنی چاہئے۔ انہوں نے کہا کہ ایسا کوئی مسئلہ نہیں جسے حل نہ کیا جا سکے لیکن اس مسئلے کو حل کرنے کے لئے مضبوط عزم کی ضرورت ہے۔

ڈاکٹر خرم نے کہا کہ پاکستان کی کل ٹیکسٹائل برآمدات میں صرف فیصل آباد کا حصہ 60 فیصد ہے جو اب گھٹ کر 45 فیصد رہ گیا ہے ۔

انہوں نے کہا کہ حکومت نے برآمدات کو 60 ارب ڈالر تک بڑھانے کا ہدف مقرر کیا ہے اور اس ہدف کے حصول کے لئے سازگار کاروباری ماحول پیدا کرکے خام مال کی دستیابی کو یقینی بنانے کے علاوہ کاروبار کرنے کی لاگت کو بھی کم کیا جانا چاہئے۔ انہوں نے آئی پی پیز کے مسئلے کو حل کرنے کے لئے کچھ سفارشات بھی پیش کیں اور معیشت کو مکمل تباہی سے بچانے کے لئے واضح طور پر ٹائم لائن مقرر کرکے ترجیحی بنیادوں پر فیصلے کرنے کا مطالبہ کیا۔

کاپی رائٹ بزنس ریکارڈر، 2024