انسانی عطیات اور تحائف پر ٹیکس ریلیف: ریونیو ڈویژن کو قانون میں ترامیم پر عمل درآمد کی ہدایت

باخبر ذرائع نے بزنس ریکارڈر کو بتایا کہ وفاقی کابینہ نے ریونیو ڈویژن کو ہدایت کی ہے کہ وہ قانون/ قواعد میں ترامیم پر عمل کرے تاکہ اس بات کو یقینی بنایا جاسکے کہ حقیقی انسانی عطیات اور تحائف کو کابینہ کی منظوری کے بغیر ٹیکسوں اور ڈیوٹیوں سے استثنیٰ دیا جائے۔

نیشنل ہیلتھ سروسز، ریگولیشنز اینڈ کوآرڈینیشن (این ایچ ایس آر اینڈ سی) ڈویژن نے حال ہی میں کابینہ کو زچگی کی صحت اور اس کے نتیجے میں ماؤں کی صحت کے مسائل سے متعلق امور پر بریفنگ دی۔

ڈویژن نے بتایا کہ پاکستان میں حاملہ خواتین میں غذائیت کی خطرناک کمی ہے اور اس وقت تولیدی عمر کی 35.5 فیصد خواتین خون کی کمی، 46.9 فیصد آئرن کی کمی، 81.2 فیصد وٹامن ڈی کی کمی، 27 فیصد وٹامن اے کی کمی جبکہ 32.6 فیصد کیلشیم کی کمی کا شکار ہیں۔

کابینہ کو مزید بتایا گیا کہ عالمی ادارہ صحت (ڈبلیو ایچ او) نے اقوام متحدہ کے بین الاقوامی مائیکرو نیوٹرینٹ زچگی سے قبل تیاری کی سفارش کی تھی، جس میں حاملہ خواتین کے لئے ملٹی پل مائیکرو نیوٹرینٹ سپلیمنٹ (ایم ایم ایس) کے طور پر لیبل شدہ 15 مائکرونیوٹرینٹس شامل ہیں تاکہ مائکرو نیوٹرینٹ کی کمی کو پورا کیا جاسکے۔

واضح رہے کہ امریکا میں قائم فلاحی تنظیمیں ’کرک ہیومینیٹیرین‘ (کے ایچ) اور جنید فیملی فاؤنڈیشن (جے ایف ایف) پاکستان میں حاملہ خواتین کے لیے ایم ایم ایس عطیہ کر رہی ہیں تاکہ ان کی غذائی حالت کو بہتر بنایا جا سکے۔ اور یہ کہ اس سے قبل پاکستان کے مختلف اضلاع میں حاملہ خواتین کو دو کھیپیں موصول ہوئی تھیں اور انہیں مفت فراہم کی گئی تھیں۔ اور یہ کہ یہ شپمنٹس ملک میں ٹیکسوں اور ڈیوٹیوں کے بغیر پہنچی تھیں جس کی منظوری حکومت پاکستان کی طرف سے کورونا کے وبائی امراض اور سیلاب کی ایمرجنسی کے تناظر میں دی گئی تھی۔

این ایچ ایس آر اینڈ سی ڈویژن نے بتایا کہ کے ایچ اور جے ایف ایف دونوں نے حاملہ خواتین کے لئے ایم ایم ایس کی 1,036,800 بوتلوں کی ایک اور کھیپ عطیہ کی ہے جو پاکستان کے تمام صوبوں میں لیڈی ہیلتھ ورکرز کے ذریعے مفت فراہم کی جائے گی۔ یہ کھیپ کراچی بندرگاہ پہنچ چکی تھی اور کسٹم کلیئرنس کا انتظار کر رہی تھی۔

این ایچ ایس آر اینڈ سی کا کہنا ہے کہ اس نے پی سی ٹی کوڈ 9913 کے تحت ٹیکس اور ڈیوٹیز سے استثنیٰ حاصل کرنے کے لیے 26 مارچ 2024 کو فیڈرل بورڈ آف ریونیو (ایف بی آر) سے رابطہ کیا تھا۔ اس کے جواب میں ایف بی آر نے 28 مارچ 2024 کو او ایم کے ذریعے آگاہ کیا تھا کہ 9913 کے تحت استثنیٰ صرف ان اسپتالوں اور اداروں کو حاصل ہے جو غیر منافع بخش تنظیمیں ہیں اور این ایچ ایس آر اینڈ سی ڈویژن پی سی ٹی 9913 کے دائرہ کار میں نہیں آتا۔

این ایچ ایس آر اینڈ سی ڈویژن نے مزید وضاحت کرتے ہوئے بتایا کہ ایف بی آر نے ڈویژن کو مشورہ دیا تھا کہ پاکستان کسٹمز ٹیرف کا پی سی ٹی 9908 (آئی) تحفے یا عطیات کے طور پر موصول ہونے والی اشیاء پر ڈیوٹیز اور ٹیکسز سے استثنیٰ دیتا ہے جو وفاقی حکومت کی سفارش اور ایف بی آر کی رضامندی سے مشروط ہے۔

ایف بی آر نے این ایچ ایس آر اینڈ سی ڈویژن کو مشورہ دیا تھا کہ وہ پی سی ٹی 9908 کے تحت استثنیٰ کی منظوری کے لیے وفاقی حکومت سے رابطہ کریں۔

اجلاس میں بتایا گیا کہ وزارت خزانہ نے پی سی ٹی کوڈ 9908 (آئی) کے تحت ملٹی پل مائیکرو نیوٹرینٹ سپلیمنٹ (ایم ایم ایس) کی 10 لاکھ 36 ہزار 800 بوتلوں کی شپمنٹ کے لیے ٹیکسز اور ڈیوٹیز سے استثنیٰ دینے کی تجویز کی توثیق کی تھی۔

بحث کے دوران، کابینہ نے ٹیکسوں سے استثنیٰ، جہاں قابل اطلاق ہو، حاصل کرنے میں شامل طریقہ کار میں تاخیر کا نوٹس لیا۔

کابینہ نے ایف بی آر کو ہدایت کی کہ وہ عطیات کے تمام حقیقی معاملات میں بغیر کسی تاخیر کے ٹیکسوں اور ڈیوٹیوں سے استثنیٰ کی اجازت دے جو اس کے دائرہ اختیار میں ہیں اور بیرون ملک سے عطیات پر ڈیوٹیز، خاص طور پر ادویات، فوڈ سپلیمنٹس، امدادی سامان وغیرہ کے معاملے میں۔

کابینہ نے اس بات پر زور دیا کہ اس طرح کی اشیاء کو ضائع ہونے سے روکنے اور وصول کنندگان کو فوری طور پر فراہم کرنے کے لئے ضروری ہے کہ عطیات پر ٹیکسوں اور ڈیوٹیوں سے استثنیٰ دینے کے طریقہ کار کو آسان اور ہموار کیا جائے۔ یہ بھی کہا گیا کہ اس طرح کی کھیپوں پر کارروائی کرنے والے حکام کو ایسے معاملوں کی صداقت کی تصدیق کرنی ہوگی۔

کابینہ نے نیشنل ہیلتھ سروسز، ریگولیشنز اینڈ کوآرڈینیشن ڈویژن سمیت تمام وزارتوں/ ڈویژنز کو ہدایت کی کہ عطیات کے تمام کیسز پر تیزی سے کارروائی کی جائے۔

کابینہ نے ایف بی آر کو ہدایت کی کہ عطیات کے تمام حقیقی کیسز میں بلا تاخیر ٹیکسز اور ڈیوٹیز سے استثنیٰ دیا جائے۔

ایف بی آر کی اہلیت سے باہر کے کیسز کے حوالے سے کابینہ نے ریونیو ڈویژن کو ہدایت کی کہ وہ قانون اور قواعد میں ترامیم پر عمل کرے تاکہ اس بات کو یقینی بنایا جاسکے کہ انسانی ہمدردی کے عطیات اور تحائف کے حقیقی کیسز کو کابینہ کی منظوری کے بغیر ٹیکسوں اور ڈیوٹیز سے استثنیٰ دیا جائے۔

کاپی رائٹ بزنس ریکارڈر، 2024