محسن نقوی وزیراعظم اور فیلڈ مارشل عاصم منیر کا پیغام لیکر تہران پہنچ گئے

وزیر داخلہ محسن نقوی تہران پہنچ گئے ہیں جہاں وہ وزیراعظم شہباز شریف اور چیف آف ڈیفنس اسٹاف فیلڈ مارشل عاصم منیر کے پیغامات ایران کے سپریم لیڈر آیت اللہ خامنہ ای تک پہنچائیں گے۔ یہ دورہ مشرقِ وسطیٰ میں بڑھتی ہوئی کشیدگی کے دوران کیا جا رہا ہے۔

تہران پہنچنے کے بعد میڈیا سے گفتگو کرتے ہوئے محسن نقوی نے کہا کہ وہ فیلڈ مارشل عاصم منیر کا ایک خصوصی خط ایرانی قیادت کو پیش کریں گے، جبکہ وزیراعظم شہباز شریف کا خط بھی علاقائی صورتحال سے متعلق پیغام کے طور پر ساتھ لایا گیا ہے۔

یہ دورہ ایسے وقت میں ہو رہا ہے جب حالیہ امریکی فضائی حملوں کے بعد خطے میں کشیدگی میں اضافہ دیکھا جا رہا ہے۔ ان حملوں میں ایران کے ساحلی نگرانی ریڈارز کو گوروک اور قشم جزیرے پر نشانہ بنایا گیا تھا۔

اس کے جواب میں ایران نے خلیجی ممالک میں موجود امریکی فوجی اڈوں کو نشانہ بنایا، جن میں کویت اور بحرین کے اڈے بھی شامل ہیں، جس سے خطے میں بڑے تصادم کے خدشات بڑھ گئے ہیں۔

محسن نقوی ہفتے کی رات تہران پہنچے اور توقع ہے کہ وہ ایرانی اعلیٰ حکام کے ساتھ تیزی سے بدلتی ہوئی سکیورٹی صورتحال اور باہمی دلچسپی کے امور پر مشاورت کریں گے۔

پاکستان نے مسلسل فریقین سے تحمل اور مذاکرات کی اپیل کی ہے اور خبردار کیا ہے کہ کشیدگی میں اضافہ خطے کے امن و استحکام کے لیے خطرناک ثابت ہو سکتا ہے۔