ایران نے امریکا کو بتایا ہے کہ وہ انتہائی مشکل صورتحال میں ہے، ٹرمپ کا دعوی

امریکا اور ایران کے درمیان جاری تنازع کے خاتمے کی کوششیں تعطل کا شکار ہیں، جبکہ امریکی صدر ڈونلڈ ٹرمپ نے تہران کی تازہ تجویز پر عدم اطمینان کا اظہار کیا۔ ٹرمپ کے مطابق ایران نے امریکا کو بتایا ہے کہ وہ انتہائی مشکل صورتحال میں ہے اور اپنی قیادت کے معاملات طے کرنے کی کوشش کر رہا ہے۔

ایران کی جانب سے پیش کی گئی حالیہ تجویز میں کہا گیا تھا کہ دو ماہ سے جاری جنگ کے خاتمے اور سمندری راستوں کے تنازعات حل ہونے تک جوہری پروگرام پر بات مؤخر رکھی جائے۔ تاہم امریکی مؤقف یہ ہے کہ جوہری معاملہ ابتدا ہی میں حل ہونا چاہیے۔

ٹرمپ نے اپنے سوشل میڈیا پلیٹ فارم پر بیان دیتے ہوئے کہا کہ ایران چاہتا ہے کہ آبنائے ہرمز کو جلد از جلد کھولا جائے، جبکہ وہ اپنی قیادت کے بحران سے نمٹنے کی کوشش کر رہا ہے۔ تاہم ایران کی جانب سے اس بیان پر فوری طور پر کوئی ردعمل سامنے نہیں آیا۔

دوسری جانب ایرانی فوج کے ترجمان نے سرکاری میڈیا کو بتایا کہ ایران اس جنگ کو ختم شدہ نہیں سمجھتا۔ جنگ کے آغاز کے بعد سے ایران نے آبنائے ہرمز میں اپنی شپنگ کے علاوہ دیگر جہازوں کی آمدورفت کو بڑی حد تک محدود کر رکھا ہے، جبکہ امریکا نے بھی ایرانی جہازوں کی ناکہ بندی شروع کر دی ہے۔

ادھر امن کوششوں کو اس وقت مزید دھچکا لگا جب ٹرمپ نے اپنے نمائندوں کا پاکستان کا دورہ منسوخ کر دیا۔ ایرانی وزیر خارجہ عباس عراقچی نے بھی حالیہ دنوں میں اسلام آباد کے متعدد دورے کیے۔

امریکی اور اسرائیلی حملوں میں ایرانی قیادت کے اہم افراد کی ہلاکت کے بعد ملک میں طاقت کا توازن تبدیل ہو گیا ہے، جس کے باعث مذاکراتی مؤقف مزید سخت ہونے کا خدشہ ظاہر کیا جا رہا ہے۔