ای سی سی نے گندم درآمدی طریقہ کار کیلئے اسٹیئرنگ کمیٹی کی منظوری دے دی
- کمیٹی کی سربراہی نائب وزیراعظم کریں گے
کابینہ کی اقتصادی رابطہ کمیٹی (ای سی سی) نے گندم کی درآمد کے طریقہ کار کو مؤثر بنانے کے لیے ایک اعلیٰ سطح اسٹیئرنگ کمیٹی کے قیام کی منظوری دے دی ہے۔
کمیٹی ملک میں گندم درآمد کی ضرورت، صوبوں کی طلب اور درآمدی عمل کے آپریشنل طریقہ کار کا جائزہ لے کر سفارشات مرتب کرے گی
وفاقی وزیر خزانہ و محصولات سینیٹر محمد اورنگزیب نے ای سی سی اجلاس کی ورچوئل صدارت کی۔
ای سی سی نے وزارتِ قومی غذائی تحفظ و تحقیق کی جانب سے پیش کی گئی سمری پر غور کیا اور گندم درآمدی طریقہ کار وضع کرنے کے لیے اسٹیئرنگ کمیٹی کے قیام کی منظوری دے دی۔ اسٹیئرنگ کمیٹی میں وفاقی وزیر برائے قومی غذائی تحفظ و تحقیق، وفاقی وزیر تجارت، وفاقی وزیر برائے اقتصادی امور، وزیر قانون، نائب وزیراعظم/وزیر خارجہ کے دفتر کے رابطہ کاری کے لیے معاون خصوصی، وزیراعظم کے زراعت و غذائی تحفظ سے متعلق کوآرڈینیٹر، سیکریٹری خزانہ، سیکریٹری وزارت تجارت، سیکریٹری وزارت قومی غذائی تحفظ و تحقیق، چیئرمین فیڈرل بورڈ آف ریونیو (ایف بی آر)، پنجاب، سندھ، خیبرپختونخوا اور بلوچستان کے چیف سیکریٹریز، جبکہ چیئرمین ٹریڈنگ کارپوریشن آف پاکستان (ٹی سی پی) شامل ہوں گے۔ کمیٹی کی سربراہی نائب وزیراعظم کریں گے۔
کاپی رائٹ بزنس ریکارڈر 2026