چاغی میں تانبے اور سونے کے ذخائر کی تلاش، ایوانہو اٹلانٹک اور ماری منرلز میں معاہدہ

وفاقی وزیر پیٹرولیم علی پرویز ملک نے جمعرات کو پاکستان منرلز انویسٹمنٹ فورم (پی ایم آئی ایف) کے موقع پر بین الاقوامی کان کنی اور سرمایہ کاری کی نمایاں کمپنیوں کے نمائندوں سے متعدد دوطرفہ ملاقاتیں کیں۔ ان ملاقاتوں میں معدنیات کے شعبے میں غیر ملکی سرمایہ کاری کے حصول اور بین الاقوامی شراکت داریوں کو وسعت دینے کے لیے پاکستان کے عزم کو اجاگر کیا گیا۔

ان ملاقاتوں کے دوران وفاقی وزیر نے بیرک مائننگ کارپوریشن کے چیئرمین جان تھورنٹن سے الگ ملاقات کی جس میں کمپنی کی اعلیٰ قیادت بھی ان کے ہمراہ تھی۔ انہوں نے اسکاٹ لینڈ کی کان کنی اور انجینئرنگ کمپنی وئیر کے چیف ایگزیکٹو اینڈریو نیلسن، سنگاپور میں قائم ٹریفیگورا کے شعبہ دھات و معدنیات (مشرقِ وسطیٰ و شمالی افریقا) کے سربراہ ابراہیم الغزار اور ان کے وفد جب کہ ترکیہ کی چالک ہولڈنگ کے چیف ایگزیکٹو مصطفیٰ آکسوئے سے بھی علیحدہ ملاقاتیں کیں۔ اس کے علاوہ انہوں نے ایوانہو اٹلانٹک کے رابرٹ فریڈلینڈ کی قیادت میں آنے والے وفد سے بھی ملاقات کی۔

ملاقات کے دوران اینڈریو نیلسن نے پاکستان کے کان کنی کے شعبے میں اپنی کمپنی وئیر کی سرگرمیوں کو وسعت دینے میں دلچسپی کا اظہار کرتے ہوئے کہا کہ کمپنی ریکوڈک میں پہلے سے جاری شمولیت کے علاوہ پاکستان میں مزید منصوبوں میں بھی حصہ لینے کی خواہاں ہے۔

ابراہیم الغزار نے پاکستان کے زنک اور بارائٹ منصوبے میں ٹریفیگورا کی گہری دلچسپی کا اظہار کیا۔ انہوں نے پاکستان کے ایل پی جی، بانڈڈ اسٹوریج اور ریفائنری کے شعبوں میں بھی کاروباری مواقع تلاش کرنے میں کمپنی کی دلچسپی ظاہر کی۔

جان تھورنٹن نے کہا کہ پاکستان کا دورہ کرنا ہمیشہ خوشی کا باعث ہوتا ہے، جو ملک کے ساتھ کمپنی کی مسلسل وابستگی کا عکاس ہے۔

وفاقی وزیر نے کان کنی کے شعبے کی بڑی کمپنی ایوانہو اٹلانٹک اور ماری منرلز کے درمیان بلوچستان کے ضلع چاغی میں تانبے اور سونے کے ذخائر کی تلاش کے لیے معاہدے پر دستخط کی تقریب میں بھی شرکت کی۔ معاہدے کے تحت دونوں کمپنیاں علاقے کی معدنی صلاحیت کا جائزہ لینے اور تانبے اور سونے کے ذخائر کی ترقی کے مواقع کی نشاندہی کے لیے تلاش و تحقیق کی سرگرمیاں انجام دینے کا ارادہ رکھتی ہیں۔

وفاقی وزیر نے پاکستان کے معدنیات کے شعبے میں بین الاقوامی کمپنیوں کی بڑھتی ہوئی دلچسپی کا خیرمقدم کیا اور اس بات پر زور دیا کہ پاکستان منرلز انویسٹمنٹ فورم عالمی سرمایہ کاروں کو سرمایہ کاری کے مواقع سے جوڑنے، شراکت داریوں کو فروغ دینے اور ملک کی وسیع معدنی صلاحیت سے استفادہ کرنے کے لیے ایک اہم پلیٹ فارم فراہم کرتا ہے۔