کھاد کی ترسیل پر پابندیاں

خیبر پختونخوا اور بلوچستان کو کھاد کی فراہمی میں مبینہ تعطل، جو وزارت داخلہ کے ایک نوٹیفکیشن کے تحت عائد پابندیوں کے بعد سامنے آیا ہے، ایسے وقت میں پیش آیا ہے جب کسان اپنی ربیع کی فصلوں کی تیاری اور کاشت میں مصروف ہیں۔ یہ اس کے لیے انتہائی نامناسب وقت ہے۔

اطلاعات کے مطابق کمپنیاں کاشت کے موسم کے دوران ایک ضروری زرعی ضرورت کی ترسیل کرنے سے قاصر ہیں، جبکہ حکام بظاہر کاشت کاروں اور سپلائرز کو کسی قابل عمل انتظام کے انتظار میں چھوڑ چکے ہیں۔ پہلے ہی بدامنی کے غیر معمولی بوجھ کا سامنا کرنے والے ان دونوں صوبوں کے لیے یہ مشکلات کی طویل فہرست میں ایک ناقابل قبول اضافہ ہے۔

ان پابندیوں کے پس پشت سیکیورٹی خدشات کو محض نظر انداز نہیں کیا جاسکتا۔ غیر مجاز نقل و حرکت اور کھاد کے ممکنہ غیر قانونی استعمال یا دوسری جگہ منتقلی ایسے معاملات ہیں جن سے حکام کو نمٹنا چاہیے، خصوصاً ان علاقوں میں جہاں عسکریت پسندوں کے تشدد کا خطرہ مسلسل موجود ہے۔ لیکن یہی وجہ ہے کہ اس فیصلے کے تحت جائز تجارتی ترسیل میں خلل ڈالنے کے بجائے ایک سوچے سمجھے اور منظم نظامِ نگرانی کی ضرورت ہے۔

سیکیورٹی اداروں اور سول انتظامیہ سے توقع کی جاتی ہے کہ وہ مختلف ترجیحات کے درمیان توازن قائم رکھیں گے۔ اگر ترسیل سے متعلق کسی خطرے کے جواب میں خود ترسیل کے عمل کو ہی متاثر کیا جائے تو یہ سوال پیدا ہونا فطری ہے کہ حکومتی مشینری آخر کس مقصد کے لیے کام کر رہی ہے۔

ایسی کوئی واضح وجہ دکھائی نہیں دیتی کہ وفاقی اور صوبائی حکومتیں، کھاد بنانے والی کمپنیاں، تقسیم کار اور کسانوں کے نمائندے مل بیٹھ کر نگرانی میں کھاد کی ترسیل کے انتظامات پر اتفاق نہیں کرسکتے۔

اجازت نامے، تصدیق شدہ منزلیں، دستاویزی کھیپیں اور مقررہ راستوں پر جانچ پڑتال ان ممکنہ اقدامات میں شامل ہیں جن کا جائزہ لیا جاسکتا ہے۔ متعلقہ فریق پہلے ہی خیبر پختونخوا میں کنٹرول شدہ ترسیل اور ٹریک اینڈ ٹریس سسٹم پر تیزی سے عمل درآمد کی تجاویز دے چکے ہیں، جبکہ عبوری طور پر نگرانی کی شرط کے ساتھ ترسیل کی اجازت دینے کی تجویز بھی پیش کی گئی ہے۔ ان تجاویز کا فوری جائزہ لیا جانا چاہیے اور جہاں ممکن ہو، ان پر عمل درآمد کیا جانا چاہیے۔

حکام کو چاہیے کہ وہ کسی بھی عملی رکاوٹ یا اعتراض کی وضاحت کریں، بجائے اس کے کہ انتظامی تعطل کو زرعی بحران میں تبدیل ہونے دیا جائے۔

اس معاملے میں وقت کی اہمیت اسے مزید سنگین بناتی ہے۔ کسان سرکاری دفتری کارروائیوں اور غور و خوض کی خاطر زرعی کیلنڈر کو مؤخر نہیں کرسکتے۔

کھاد تک رسائی میں تاخیر سے فصلوں کی بوائی کا شیڈول متاثر ہوسکتا ہے، فصلوں کی نشوونما میں رکاوٹ آسکتی ہے اور بالآخر پیداوار میں کمی واقع ہوسکتی ہے۔ اضافی اخراجات اور غیر یقینی صورت حال کا سارا بوجھ ان کاشت کاروں پر پڑے گا جنہیں پہلے ہی زرعی مداخل کی غیر مستحکم قیمتوں، محدود قوت خرید اور مشکل کاروباری حالات کا سامنا ہے۔

اس کے اثرات انفرادی کھیتوں تک محدود نہیں رہیں گے بلکہ دیہی روزگار، صوبائی زرعی پیداوار اور مجموعی غذائی رسد بھی متاثر ہوسکتی ہے۔ داؤ پر اتنا کچھ لگا ہوا ہے کہ حکام کی عدم فعالیت کو معمول کی دفتری کارروائی میں تاخیر سمجھ کر نظر انداز نہیں کیا جاسکتا۔

یہ واقعہ پالیسی سازی کے اس بدقسمت طرز عمل کی بھی عکاسی کرتا ہے جس کے تحت اہم نتائج کے حامل فیصلے ان لوگوں کے ساتھ ان کے اثرات پر پہلے سے غور کیے بغیر کرلیے جاتے ہیں جنہیں بعد میں ان فیصلوں کے نتائج بھگتنا پڑتے ہیں۔ اگر پابندیاں نافذ کرنے سے پہلے کھاد بنانے والی کمپنیوں، تقسیم کاروں، صوبائی حکام اور کسانوں سے مناسب مشاورت کی جاتی تو جائز ترسیل برقرار رکھتے ہوئے سیکیورٹی یقینی بنانے کا مسئلہ ابتدا ہی میں حل کیا جاسکتا تھا۔

اس کے برعکس، اطلاعات کے مطابق ترسیل میں خلل پڑنے کے بعد متعلقہ فریق اب ہنگامی مشاورت کے خواہاں ہیں۔ پہلے پابندیاں عائد کرنا اور بعد میں مشاورت کرنا، پالیسی سازی میں مہارت اور قابلیت کا متبادل نہیں ہوسکتا۔

اس معاملے کا جغرافیائی پہلو بھی حکام کی بظاہر عدم پیش بینی کو مزید ناقابل دفاع بناتا ہے۔ خیبر پختونخوا اور بلوچستان کو بگڑتی ہوئی سیکیورٹی صورت حال کے باعث معاشی سرگرمیوں میں تعطل، غیر یقینی حالات اور روزمرہ زندگی پر پڑنے والے دباؤ کی صورت میں پہلے ہی بھاری قیمت چکانا پڑی ہے۔

ان صوبوں کے کسانوں کو دوہری سزا نہیں ملنی چاہیے، پہلی سزا اس بدامنی کی صورت میں جو سخت پابندیوں کی ضرورت پیدا کرتی ہے، اور دوسری ان پابندیوں کی صورت میں جو انہیں اپنی زمینوں پر کاشت کرنے سے روکیں۔ زرعی شعبے کے لیے ضروری اشیا تک یکساں رسائی ایک جائز توقع ہے، نہ کہ کوئی ایسی غیر معمولی رعایت جس کے لیے ہر فصل کی بوائی کے موسم میں مذاکرات کرنا پڑیں۔

لہٰذا وزارت داخلہ کو چاہیے کہ وہ اپنے نوٹیفکیشن کے دائرہ کار اور اس کے جواز کی فوری وضاحت کرے اور صوبائی حکام اور کھاد کی صنعت کے ساتھ مل کر قانونی اور نگرانی کے تحت کھاد کی ترسیل بحال کرے۔

تمام حفاظتی اقدامات قابلِ نفاذ، متناسب اور زرعی کیلنڈر سے ہم آہنگ ہونے چاہئیں۔ اگر اس صورت حال کو مزید طول دیا گیا تو یہ ایسے وقت میں حکومتی رابطہ کاری اور انتظامی فیصلہ سازی کی ناکامی ظاہر کرے گا جب دونوں کی اشد ضرورت ہے۔

حکومت میں اتنی صلاحیت ہونی چاہیے کہ وہ سیکیورٹی کا تحفظ بھی یقینی بنائے اور کسانوں کو اس کی جانب سے ایک معقول حل ترتیب دینے میں ناکامی کی قیمت بھی نہ چکانا پڑے۔

کاپی رائٹ بزنس ریکارڈر، 2026