کرکٹ آسٹریلیا کے چیف ایگزیکٹو کا سینڈ پیپر گیٹ اسکینڈل کی دوبارہ تحقیقات نہ کرانے کا اعلان
- گرین برگ کا کہنا ہے کہ ان کی کتاب میں بعض تفصیلات دوسروں کے پیش کردہ مؤقف سے متضاد ہیں
کرکٹ آسٹریلیا کے چیف ایگزیکٹو ٹوڈ گرین برگ نے 2018 کے بال ٹیمپرنگ اسکینڈل ’سینڈ پیپر گیٹ‘ کی دوبارہ تحقیقات کرانے سے انکار کردیا ہے، حالانکہ عثمان خواجہ اور ڈیوڈ وارنر نے دعویٰ کیا ہے کہ گیند سے چھیڑ چھاڑ کے منصوبے کا علم پوری ٹیم کو تھا۔
گرین برگ نے منگل کو ریڈیو اسٹیشن ایس ای این سے گفتگو کرتے ہوئے کہا کہ عثمان خواجہ کی نئی خودنوشت میں جنوبی افریقہ کے دورے سے متعلق بیان کردہ واقعات پر دیگر کھلاڑیوں کے مؤقف مختلف ہیں۔
ان کے مطابق کتاب میں بعض تفصیلات دوسرے کھلاڑیوں کے بیانات سے متضاد ہیں، تاہم کرکٹ آسٹریلیا دستیاب شواہد کی بنیاد پر سابقہ تحقیقات کے نتائج سے مطمئن ہے اور دوبارہ تحقیقات کی کوئی ٹھوس وجہ نہیں دیکھتا۔
واضح رہے کہ 2018 میں کیپ ٹاؤن ٹیسٹ کے دوران بال ٹیمپرنگ کا معاملہ سامنے آنے کے بعد کرکٹ آسٹریلیا نے ڈیوڈ وارنر، اسٹیو اسمتھ اور کیمرون بینکرافٹ پر پابندیاں عائد کی تھیں۔
عثمان خواجہ نے اپنی کتاب میں انکشاف کیا کہ جنوبی افریقہ سیریز کے دوران گیند کو خراب کرنے کے طریقوں، بشمول سینڈ پیپر کے استعمال پر پوری ٹیم میں کھل کر گفتگو ہوتی تھی۔
ڈیوڈ وارنر نے بھی خواجہ کے بیان کی مکمل حمایت کرتے ہوئے سابقہ تحقیقات کو جلد بازی میں کی گئی اور ناقص قرار دیا۔
خواجہ نے کتاب کی فروخت کے لیے یہ معاملہ اٹھانے کے الزامات مسترد کرتے ہوئے کہا کہ انہیں پیسوں کی ضرورت نہیں۔
Comments