کارلوس الکاراز نے ڈی مینار کو ہرا کر ویانا ٹینس ٹائٹل جیت لیا

اسپین کے کارلوس الکاراز نے آسٹریلیا کے ایلکس ڈی مینار کو 6-1 اور 6-4 سے شکست دے کر ویانا اوپن ٹینس ٹورنامنٹ جیت لیا۔ یہ رواں سیزن میں ان کا چوتھا جبکہ کیریئر کا 28واں ٹائٹل ہے۔ اس کامیابی کے ساتھ اے ٹی پی 500 ایونٹس میں ان کی مسلسل فتوحات کا سلسلہ 26 میچوں تک پہنچ گیا۔

23 سالہ عالمی نمبر دو کھلاڑی نے دوحہ اور ٹوکیو کے بعد ویانا میں بھی ٹائٹل اپنے نام کیا۔ انہوں نے 2026 میں اے ٹی پی 500 ٹورنامنٹس میں ناقابلِ شکست رہتے ہوئے 16 میچ جیتے اور ویانا میں اپنے پانچوں مقابلے بغیر کوئی سیٹ ہارے مکمل کیے۔

الکاراز نے ابتدا ہی سے کھیل پر گرفت مضبوط رکھی اور پہلے گیم میں ڈی مینار کی سروس توڑ دی۔ انہوں نے پہلا سیٹ یکطرفہ مقابلے کے بعد 6-1 سے جیتا جبکہ دوسرے سیٹ میں آسٹریلوی کھلاڑی نے بہتر مزاحمت کی لیکن الکاراز نے 97 منٹ میں مقابلہ اپنے نام کرلیا۔

اس کامیابی کے ساتھ الکاراز نے ڈی مینار کے خلاف مسلسل ساتویں فتح حاصل کی۔ سات مرتبہ کے گرینڈ سلیم چیمپئن اب پیرس ماسٹرز میں شرکت کریں گے۔ وہ پہلے ہی ٹورین میں ہونے والے سیزن کے اختتامی اے ٹی پی فائنلز کے لیے کوالیفائی کرچکے ہیں۔