چیرات سیمنٹ کا نمر انڈسٹریل کیمیکلز میں 24 ارب سے اکثریتی حصص خریدنے کا معاہدہ

چیرات سیمنٹ نے نمر انڈسٹریل کیمیکلز لمیٹڈ (این آئی سی ایل) میں اکثریتی حصص حاصل کرنے کے لیے 24 ارب روپے سے زائد، یعنی تقریباً 86.6 ملین ڈالر کے معاہدوں پر دستخط کردیے ہیں۔

کمپنی نے پیر کو پاکستان اسٹاک ایکسچینج (پی ایس ایکس) میں جمع کرائی گئی ایک دستاویز میں اس پیش رفت سے آگاہ کیا۔

چیرات سیمنٹ نے 30 اکتوبر 2026 کو این آئی سی ایل کے حصص یافتگان کے ساتھ دو حصص خریداری کے معاہدے کیے، جن کے تحت مجموعی طور پر 70.86 ملین عام حصص حاصل کیے جائیں گے۔

پہلے معاہدے کے تحت کمپنی این آئی سی ایل کے اکثریتی حصص یافتگان سے 56.40 ملین حصص خریدے گی، جو کمپنی کے 51 فیصد حصص کے مساوی ہیں۔ دوسرے معاہدے میں بعض غیر کنٹرولنگ حصص یافتگان سے 14.46 ملین حصص کی خریداری شامل ہے، جو 13.07 فیصد حصص بنتے ہیں۔

اس طرح مجموعی لین دین کے تحت این آئی سی ایل کے جاری کردہ حصص کے 64.07 فیصد حصص حاصل کیے جائیں گے، جن کی طے شدہ قیمت 340 روپے فی حصص ہے۔

کمپنی کے نوٹس کے مطابق معاہدے کی تکمیل ضروری ریگولیٹری اور دیگر منظوریوں کے حصول اور متعلقہ حصص خریداری کے معاہدوں میں درج پیشگی شرائط پوری ہونے سے مشروط ہے۔

چیرات سیمنٹ ایک لسٹڈ کمپنی ہے جو سیمنٹ کی تیاری، مارکیٹنگ اور فروخت کے کاروبار سے وابستہ ہے۔ اس کی نصب شدہ پیداواری صلاحیت تقریباً 4.5 ملین ٹن سالانہ ہے اور یہ بنیادی طور پر شمالی پاکستان کی مارکیٹوں کو خدمات فراہم کرتی ہے۔

کمپنی افغانستان کو بھی سیمنٹ برآمد کرتی ہے، جس سے پاکستان کی علاقائی تجارت اور برآمدی آمدنی میں حصہ ڈالا جاتا ہے۔

نمر انڈسٹریل کیمیکلز لمیٹڈ کیمیکلز کی تیاری اور مارکیٹنگ کے کاروبار سے وابستہ ہے اور پاکستان اسٹاک ایکسچینج میں لسٹڈ ہے۔