پاکستان نے ایس سی او انٹر بینک کنسورشیم کی چیئرمین شپ سنبھال لی

پاکستان نے شنگھائی تعاون تنظیم کے انٹر بینک کنسورشیم (ایس سی او۔آئی بی سی) کی 2026-27 کے لیے چیئرمین شپ سنبھال لی ہے، جبکہ ایچ بی ایل کے چیئرمین سلطان علی علانہ نے کنسورشیم کے چیئرمین کا عہدہ سنبھال لیا ہے۔

یہ پیش رفت اسی مدت کے لیے شنگھائی تعاون تنظیم (ایس سی او) کی سربراہی پاکستان کو ملنے کے موقع پر سامنے آئی ہے۔

وزارتِ خزانہ نے پیر کو جاری بیان میں سلطان علی علانہ کو یہ ذمہ داری سنبھالنے پر مبارک باد دی اور اس عزم کا اعادہ کیا کہ پاکستان ایس سی او کے رکن ممالک کے درمیان اقتصادی شراکت داری مضبوط بنانے، سرحد پار تجارت اور سرمایہ کاری میں سہولت فراہم کرنے اور علاقائی روابط و انضمام کو آگے بڑھانے کے لیے اپنا کردار ادا کرتا رہے گا۔

ایس سی او۔آئی بی سی رکن ممالک کے درمیان مالیاتی تعاون کا ایک اہم پلیٹ فارم ہے۔ اس کا مقصد کثیرالجہتی اداروں کے ساتھ تعاون کے ذریعے پائیدار ترقی کو فروغ دینا، علاقائی تجارت اور سرمایہ کاری میں اضافہ کرنا اور سرحد پار بڑے منصوبوں کی ترقی کے لیے نئے طریقہ کار تلاش کرنا ہے۔

پاکستان کے سب سے بڑے بینک ایچ بی ایل نے 8 اگست 2014 کو کنسورشیم میں شراکت دار بینک کی حیثیت سے شمولیت اختیار کی تھی، جبکہ جون 2018 میں کونسل کے 14ویں سالانہ اجلاس میں اسے رکن بینک کا درجہ دیا گیا۔

2 جولائی 2026 کو کرغزستان کے دارالحکومت بشکیک میں منعقدہ سالانہ کونسل اجلاس میں 2026-27 کی مدت کے لیے ایچ بی ایل کو ایس سی او۔آئی بی سی کی کونسل کا چیئرمین نامزد کیا گیا تھا۔

یہ نامزدگی ستمبر 2026 میں شنگھائی تعاون تنظیم کے سربراہانِ مملکت کی کونسل کی چیئرمین شپ پاکستان کو ملنے کے ساتھ بھی مطابقت رکھتی ہے۔