مشرق وسطیٰ صورتحال، پی آئی اے کا ریاض کیلئے فضائی آپریشن معطل

مشرق وسطیٰ کی بگڑتی صورتحال کے پیش نظر پاکستان انٹرنیشنل ایئرلائنز (پی آئی اے) نے ریاض کیلئے فضائی آپریشن عارضی طور پر معطل کردیا ہے۔

ترجمان پی آئی اے کے مطابق مسافروں کو یہ ہدایت کی گئی ہے کہ وہ ایئرپورٹ روانہ ہونے سے قبل اپنی پروازوں کی تازہ ترین صورتحال کی تصدیق کے لیے پی آئی اے کے کال سینٹر 786-786 -111 پر رابطہ کریں۔

پی آئی اے نے پروازوں کی معطلی کے باعث مسافروں کو ہونے والی زحمت پر معذرت بھی کی ہے۔

یہ پیش رفت ایسے وقت میں سامنے آئی ہے جب یمن کے حوثیوں نے ایک روز قبل سعودی عرب پر حملوں کی کارروائیوں میں شدت پیدا کردی تھی۔ حوثی میزائل حملوں کے ذریعے مملکت کی فضائی حدود اور تیل کی تنصیبات کو بند کرنے کی کوشش کررہے ہیں جب کہ رواں ہفتے ان حملوں میں تین افراد بھی مارے جاچکے ہیں۔

حوثیوں نے دعویٰ کیا کہ انہوں نے ریاض ایئرپورٹ کو نشانہ بنایا جہاں عینی شاہدین نے ایک طیارے سے دھواں اٹھتے دیکھا۔ گروپ نے کارکنوں کو توانائی کی تنصیبات سے دور رہنے کی تنبیہ بھی کی۔ سعودی حکام کے مطابق فضا میں تباہ کیے گئے ایک میزائل کا ملبہ ایک کنڈرگارٹن اور طبی مرکز پر گرا۔

حوثیوں کے حملوں کے بعد لفتھانزا اور ایئر انڈیا نے بھی ریاض کیلئے اپنی پروازیں معطل کردی ہیں۔

حوثیوں کا کہنا ہے کہ وہ یمن میں دوبارہ شدت اختیار کرنے والی خانہ جنگی میں حکومتی فورسز کی حمایت کرنے پر سعودی عرب کو نشانہ بنا رہے ہیں۔ سعودی عرب کے مطابق وہ یمن کی اقوام متحدہ سے تسلیم شدہ حکومت کی اس کارروائی کی حمایت کررہا ہے جس کا مقصد حوثیوں سے علاقے واپس لینا ہے۔