ٹرمپ کا نومبر کے وسط مدتی انتخابات سے قبل ایران پر حملہ نہ کرنے کا اعلان

امریکی صدر ڈونلڈ ٹرمپ نے جمعرات کو کہا ہے کہ امریکا ایران کے ساتھ تعمیری مذاکرات کررہا ہے اور نومبر میں ہونے والے امریکی وسط مدتی کانگریسی انتخابات سے قبل ایران پر حملہ نہیں کرے گا۔

ٹرمپ نے ٹروتھ سوشل پر ایک پوسٹ میں لکھا، ’’ہم اسلامی جمہوریہ ایران کے ساتھ تعمیری مذاکرات کررہے ہیں۔‘‘ انہوں نے کہا کہ ایرانی بندرگاہوں کی امریکی ناکہ بندی بدستور برقرار ہے اور آبنائے ہرمز سے تیل کی ترسیل جاری ہے۔

ٹرمپ نے کہا، ’’ہم 3 نومبر کو امریکا میں ہونے والے وسط مدتی انتخابات سے قبل کسی بھی وقت ایران پر حملہ نہیں کریں گے۔‘‘

امریکا اور اسرائیل نے فروری میں ایران پر حملے شروع کیے تھے اور جنگ، جس پر ہر ماہ 3 ارب ڈالر لاگت آتی ہے، امریکی انتخابی مہم میں ایک اہم موضوع بن چکی ہے۔

ٹرمپ بارہا کہہ چکے ہیں کہ انہیں انتخابات کے بعد تیل کی قیمتوں میں نمایاں کمی کی توقع ہے، تاہم پٹرول کی بلند قیمتیں اور ایران جنگ ریپبلکن امیدواروں پر شدید دباؤ ڈال رہی ہیں اور کانگریس میں ان کی اکثریت کو خطرے سے دوچار کررہی ہیں۔

ایران اور امریکا نے حالیہ ہفتوں کے دوران جنگ کے خاتمے اور عالمی توانائی کی ترسیل کے لیے انتہائی اہم بحری گزرگاہ آبنائے ہرمز کو دوبارہ کھولنے کے مقصد سے تجاویز کا تبادلہ کیا ہے۔ ٹرمپ نے تہران کی تازہ ترین پیشکش مسترد کردی۔