صدر، وزیراعظم کا شیخ احمد بن راشد المکتوم کے انتقال پر اظہار تعزیت

صدر مملکت آصف علی زرداری اور وزیراعظم محمد شہباز شریف نے پیر کو متحدہ عرب امارات کے نائب صدر، وزیراعظم اور دبئی کے حکمران شیخ محمد بن راشد المکتوم کے چھوٹے بھائی شیخ احمد بن راشد المکتوم کے انتقال پر گہرے دکھ اور افسوس کا اظہار کیا ہے۔

صدر زرداری نے شیخ محمد بن راشد المکتوم اور سوگوار آل مکتوم خاندان سے دلی تعزیت کا اظہار کرتے ہوئے دعا کی کہ اللہ تعالیٰ مرحوم کی روح کو جوارِ رحمت میں جگہ عطا فرمائے اور سوگوار خاندان کو صبر و استقامت دے۔

وزیراعظم شہباز شریف نے بھی شیخ احمد بن راشد المکتوم کے انتقال پر گہرے دکھ اور افسوس کا اظہار کیا۔

وزیراعظم نے کہا کہ شیخ احمد بن راشد المکتوم نے عزت و وقار کے ساتھ اپنی زندگی دبئی اور متحدہ عرب امارات کی خدمت کے لیے وقف کر رکھی تھی۔

انہوں نے کہا، ’’پاکستان ان کی گراں قدر خدمات کو قدر کی نگاہ سے دیکھتا ہے اور ان کی یاد کو احترام و عقیدت کے ساتھ خراجِ تحسین پیش کرتا ہے۔‘‘

شہباز شریف نے شیخ محمد بن راشد المکتوم، آل مکتوم خاندان اور متحدہ عرب امارات کے عوام سے دلی تعزیت اور ہمدردی کا اظہار کیا۔

انہوں نے دعا کی کہ اللہ تعالیٰ مرحوم کی روح کو جنت الفردوس میں اعلیٰ مقام عطا فرمائے اور سوگوار خاندان کو یہ صدمہ برداشت کرنے کے لیے صبر و حوصلہ دے۔

دی نیشنل کے مطابق شیخ احمد کا پیر کو انتقال ہوگیا، جس کے بعد دبئی میں 10 روزہ سوگ کا آغاز کردیا گیا ہے۔

دبئی میڈیا آفس نے کہا کہ سرکاری سوگ کی مدت کے دوران پرچم سرنگوں رہیں گے۔

شیخ احمد دبئی پولیس کے ڈپٹی چیئرمین کے عہدے پر فائز رہے اور طویل عرصے تک الوصل اسپورٹس کلب کے صدر بھی رہے۔