کریملن: یوکرین، امریکا سے امن مذاکرات کی بحالی خارج از امکان نہیں

کریملن نے پیر کو کہا ہے کہ روس، یوکرین اور امریکا کے درمیان امن مذاکرات کی بحالی کے امکان کو مسترد نہیں کیا جاسکتا، تاہم اس کا کہنا تھا کہ یہ کہنا ابھی قبل از وقت ہے کہ ایسے مذاکرات کب اور کہاں منعقد ہوسکتے ہیں۔

کریملن کے ترجمان دمتری پیسکوف نے یہ بیان امریکی نمائندوں اسٹیو وٹکوف اور جیرڈ کشنر کے ہفتے کے اختتام پر ماسکو اور کیف کے دورے سے متعلق سوال کے جواب میں دیا۔ دونوں امریکی نمائندے یوکرین میں جنگ کے خاتمے کی راہ تلاش کرنے کے لیے جاری تعطل کا شکار مذاکرات میں نئی جان ڈالنے کی کوشش کر رہے ہیں۔

صحافیوں نے پیسکوف سے سوال کیا کہ آیا روس، یوکرین اور امریکا کے درمیان سہ فریقی امن مذاکرات دوبارہ شروع ہوں گے؟ اس پر انہوں نے کہا، ’’جہاں تک سہ فریقی فارمیٹ کی بحالی کا تعلق ہے، آپ نے گزشتہ روز کیف کا بیان سنا ہے۔ مسٹر کشنر نے بھی ایسے ہی بیانات دیے ہیں۔ ہم بھی اس سہ فریقی فارمیٹ کی بحالی کے امکان کو مسترد نہیں کرتے، تاہم ابھی مذاکرات کے مقام اور حتمی تاریخوں کے بارے میں بات کرنا قبل از وقت ہے۔‘‘

پیسکوف نے امریکی امن تجاویز کی تازہ ترین تفصیلات یا حل طلب اہم ترین معاملات کی نوعیت پر تفصیلی بات کرنے سے گریز کرتے ہوئے کہا کہ کریملن نے روسی صدر ولادیمیر پیوٹن اور امریکی صدر ڈونلڈ ٹرمپ کے درمیان امریکی نمائندوں کے دورے پر تبادلۂ خیال کے لیے ٹیلی فونک رابطے کے امکان کو مسترد نہیں کیا۔

پیسکوف نے صحافیوں سے گفتگو کرتے ہوئے کہا، ’’بلاشبہ، ایسی ہر کوشش۔۔۔ امن کی جانب ایک چھوٹا سا قدم ہے اور ہم امریکی مذاکرات کاروں کی قیامِ امن کی کوششوں کو واقعی بہت قدر کی نگاہ سے دیکھتے ہیں۔ صدر پیوٹن خود بھی کہہ چکے ہیں کہ وہ صدر ٹرمپ کی کوششوں کو قدر کی نگاہ سے دیکھتے ہیں اور امن کی جانب اس سفر کے لیے صدر ٹرمپ کے عزم پر ان کے شکر گزار ہیں۔‘‘

پیسکوف نے کہا کہ ماسکو کو اتوار کو کیف میں امریکی نمائندوں اور یوکرینی حکام کے درمیان ہونے والے رابطوں کے بارے میں ابھی تک کوئی اطلاع موصول نہیں ہوئی۔