والد کے انتقال کے بعد میسی کی واپسی، انٹر میامی لیگز کپ سے باہر

والد کے انتقال کے بعد لیو نیل میسی جذبات سے مغلوب ہو کر میدان میں واپس لوٹ آئے اور ریٹائرمنٹ کا اشارہ بھی دیا، لیکن ان کی ٹیم انٹر میامی لیگز کپ کے میچ میں میکسیکو کے کلب لیون کے ہاتھوں 2-3 سے شکست کے بعد ٹورنامنٹ سے باہر ہو گئی۔

میامی کے کپتان اپنے والد جارج کی آخری رسومات میں شرکت کے بعد منگل کی رات ارجنٹائن سے فلوریڈا پہنچے اور بدھ کو میچ کے دوسرے ہاف میں میدان میں اترے۔ جارج، جو میسی کے ایجنٹ بھی تھے، گزشتہ ہفتے 68 برس کی عمر میں انتقال کر گئے تھے۔

میسی نے سوشل میڈیا پر والد کو خراجِ تحسین پیش کرتے ہوئے لکھا مجھے نہیں معلوم کہ میں آپ کے بغیر کیا کروں گا اور کیسے آگے بڑھوں گا۔ میں صرف فٹ بال کھیلتا تھا، لیکن اب مزید کھیلنے کے حوالے سے شدید شکوک و شبہات ہیں۔

میامی کو پہلے 0-1 کی برتری حاصل تھی لیکن کولمبیا کے ڈینیئل آرسیلا کے دو گولز نے لیون کو کامیابی دلا دی۔ 2023 میں ٹرافی جیتنے اور 2025 میں فائنل کھیلنے والی میامی کی ٹیم 2023 میں ٹورنامنٹ کی توسیع کے بعد پہلی بار ابتدائی مرحلے ہی میں باہر ہوئی ہے۔

ٹیم کے کھلاڑیوں اور مخالفت ٹیم کے کوچ نے اتنے مشکل وقت میں بھی میسی کے کھیلنے کے جذبے کو سراہتے ہوئے انہیں تمام کھلاڑیوں کے لیے ایک مثال قرار دیا۔