وفاقی چیمبر اور یو بی جی کی پہلی پاکستان اکنامک سمٹ کل سے شروع ہوگی

یونائیٹڈ بزنس گروپ (یو بی جی) کے سرپرستِ اعلیٰ ایس ایم تنویر نے اعلان کیا ہے کہ فیڈریشن آف پاکستان چیمبرز آف کامرس اینڈ انڈسٹری (ایف پی سی سی آئی) اور یونائیٹڈ بزنس گروپ مشترکہ طور پر پہلی پاکستان اکنامک سمٹ 2026 کا انعقاد کررہے ہیں۔

انہوں نے کہا کہ یہ تاریخی قومی سمٹ 29 اور 30 جولائی 2026 کو اسلام آباد کے جناح کنونشن سینٹر میں منعقد ہوگی جہاں کاروباری رہنما، چیمبرز آف کامرس، تجارتی انجمنیں، صنعت کار، ماہرینِ معیشت، پالیسی ساز اور پاکستان کی معیشت کے تمام صوبوں، اضلاع اور شعبوں سے تعلق رکھنے والے کاروباری برادری کے نمائندگان ایک ہی پلیٹ فارم پر جمع ہوں گے۔

ایس ایم تنویر نے کہا کہ سمٹ کا مقصد ملکی معیشت کو درپیش چیلنجز اور مواقع پر قومی سطح پر مکالمے کا آغاز کرنا، ایک مشترکہ حکمتِ عملی تشکیل دینا اور سرمایہ کاری، صنعتی ترقی، برآمدات، روزگار اور علاقائی ترقی کے فروغ کے لیے عملی سفارشات تیار کرنا ہے۔

انہوں نے تمام کاروباری برادری، چیمبرز آف کامرس، تجارتی انجمنوں، صنعت کاروں، تاجروں اور متعلقہ شعبوں کے تمام اسٹیک ہولڈرز کو دعوت دی کہ وہ اس قومی اقدام میں بھرپور شرکت کریں اور ہر صوبے، ضلع اور معیشت کے ہر شعبے کی ترقی کے ذریعے ایک مضبوط، مستحکم اور خوشحال پاکستان کی تعمیر کے لیے مل کر کام کریں۔