فرانس نے جنگلاتی آگ پر قابو پانے کیلئے یورپی یونین سے مدد طلب کر لی

فرانس نے بحر اوقیانوس کے ساحلی علاقے کے قریب بھڑکنے والی شدید جنگلاتی آگ پر قابو پانے کے لیے یورپی یونین سے مدد طلب کر لی ہے۔

فرانسیسی صدر ایمانوئل میکرون نے سماجی رابطے کی ویب سائٹ ایکس پر اپنے بیان میں کہا کہ ہمارے ملک، خصوصاً جیروند کے علاقے میں لگنے والی آگ کے باعث صورتحال بدستور انتہائی تشویشناک ہے،فرانس نے یورپی یونین کے سول پروٹیکشن میکانزم کو فعال کرنے کی درخواست کر دی ہے۔

صدر میکرون کے مطابق فرانس کو جلد ہی کروشیا کے دو کینیڈیئر آگ بجھانے والے طیاروں، پرتگال کے دو ایئر ٹریکٹر طیاروں، اور جمہوریہ چیک اور سلوواکیہ کے دو بھاری بلیک ہاک ہیلی کاپٹروں کی صورت میں اضافی مدد حاصل ہوگی۔

واضح رہے کہ فرانس کے جنوب مغربی علاقے میں بورڈو شہر کے مغرب میں تیزی سے پھیلنے والی جنگلاتی آگ کے باعث 10 ہزار سے زائد افراد کو راتوں رات محفوظ مقامات پر منتقل کیا گیا، جبکہ آگ کم از کم 2,400 ہیکٹر رقبے کو اپنی لپیٹ میں لے چکی ہے۔