چین کے صحرائی علاقوں میں شدید سیلاب کا الرٹ جاری

چین نے جمعہ کو اپنے شمال مغربی صوبے سنکیانگ اور قریبی علاقوں کی مقامی آبادی کو خبردار کیا کہ وہ موسمِ گرما میں شدید سیلاب کے لیے تیار رہیں جو غیر معمولی درجہ حرارت، شدید بارشوں اور گلیشیئرز کے تیزی سے پگھلنے کے باعث متوقع ہیں۔

سرکاری نشریاتی ادارے سی سی ٹی وی نے جمعہ کو رپورٹ کیا کہ سنکیانگ کا تکلامکان صحرا جو چین کا سب سے بڑا صحرا ہے, جون کے اوائل میں اس سال کے پہلے سیلاب کی زد میں آیا۔ نشر کی گئی ویڈیوز میں خشک رہنے والے ریت کے ٹیلوں میں پانی بھرے جانے کے مناظر دکھائے گئے۔

اگرچہ تکلامکان ریگستان میں 2021 سے اس نوعیت کے سیلاب آتے رہے ہیں، تاہم عموماً یہ اگست میں رونما ہوتے ہیں، جب درجہ حرارت اپنی بلند ترین سطح پر ہوتا ہے.

تاہم اس سال درجہ حرارت بہت پہلے ہی بڑھ چکا ہے۔

رائٹرز کلائمیٹ مانیٹر کے مطابق 12 جون کو سنکیانگ میں درجہ حرارت اس موسم کے اوسط سے 7.3 ڈگری زیادہ ریکارڈ کیا گیا جو 38 ڈگری سینٹی گریڈ (100 ڈگری فارن ہائیٹ) تک پہنچ گیا۔ سنکیانگ کے مغربی اور جنوبی علاقوں میں حالیہ دنوں کے دوران بارشوں کی شدت اور تعداد میں بھی اضافہ دیکھا گیا ہے۔

سی سی ٹی وی کی رپورٹ کے مطابق کچھ علاقوں میں بارش کی مقدار جون کے اوائل کی تاریخی اوسط سے دوگنا یا اس سے بھی تین گنا زیادہ رہی ہے۔