وزیر اعظم نے پاکستان ریلوے کی بہتری کے لیے اسٹریٹجک روڈ میپ کی منظوری دے دی

وزیراعظم محمد شہباز شریف نے پاکستان ریلوے کو محفوظ، سستی اور جدید ٹرانسپورٹ نیٹ ورک میں تبدیل کرنے کے لیے جامع اسٹریٹجک روڈ میپ کی منظوری دے دی۔

اتوار کو اسلام آباد میں ایک اعلیٰ سطح کے اجلاس کی صدارت کرتے ہوئے وزیراعظم نے زور دیا کہ فریٹ سیکٹر ریلوے کے نظام کی ”ریڑھ کی ہڈی“ کے طور پر کام کرتا ہے اور اسے ترجیحی بنیادوں پر ترقی دی جانی چاہیے۔ انہوں نے کہا کہ ایک مؤثر ریلوے نظام نہ صرف سڑکوں پر ٹریفک کے دباؤ کو کم کرے گا بلکہ کاربن کے اخراج کو کم کر کے ماحول دوست ٹرانسپورٹ کو بھی فروغ دے گا۔

اجلاس میں پاکستان ریلوے میں جامع اصلاحات کے لیے اسٹریٹجک روڈ میپ اور اہداف پر تفصیلی بریفنگ دی گئی۔

وزیرِاعظم کے دفتر (پی ایم او) نے کہا ہے کہ روڈ میپ میں مسافر اور فریٹ دونوں شعبوں میں مارکیٹ شیئر بڑھانے کے اہداف شامل ہیں۔ ریلوے خدمات کے معیار کو بہتر بنانا، نیٹ ورک کی استعداد بڑھانا اور مالی استحکام قائم کرنا روڈ میپ کے بنیادی ستون ہوں گے۔

بیان میں مزید کہا گیا ہے کہ ”یہ روڈ میپ ریلوے کے گورننس سسٹم کی بہتری، ڈیجیٹلائزیشن، ریلوے لائنوں کی توسیع، علاقائی روابط، عوامی-نجی شراکت داری کے ذریعے نجی شعبے کی شمولیت اور مالی استحکام قائم کرنے کے اہداف بھی شامل کرتا ہے۔“

جدید کوچز کا استعمال، مسافروں کے لیے ٹرینوں اور اسٹیشنوں پر سہولیات فراہم کرنا، ایم ایل 1،ایم ایل 2، ایم ایل 3 اور دیگر ٹریکس کی اپ گریڈنگ اور عملے کے حجم کی درستگی (رائٹ سائزنگ) بھی اصلاحات کا حصہ ہیں۔

وزیراعظم نے کہا کہ ”پاکستان ریلوے میں عوام کے لیے محفوظ اور سستی سفری سہولت اور فریٹ کے لیے قابل بھروسہ نقل و حمل کے لیے خاطر خواہ صلاحیت موجود ہے۔“

شہباز شریف نے ہدایت دی کہ ریلوے اصلاحات کے روڈ میپ کے نفاذ کے لیے عالمی شہرت یافتہ ماہرین اور مشیران کی خدمات حاصل کی جائیں۔

انہوں نے کہا کہ پاکستان ریلوے میں نجی شعبے کی سرمایہ کاری کو پبلک پرائیویٹ پارٹنرشپ ( پی پی پی) کے ذریعے فروغ دینا چاہیے۔ انہوں نے یہ بھی کہا کہ ریلوے نظام کو بہتر بنانے سے سڑکوں پر ٹریفک کا دباؤ بھی کم ہوگا۔

وزیراعظم نے کہا کہ ایک جدید اور مؤثر ریلوے نظام کاربن کے اخراج میں کمی اور ماحول دوست نقل و حمل کے فروغ میں مددگار ثابت ہوگا۔

انہوں نے مزید کہا کہ ریلوے کی زمینوں پر نجی شعبے کی سرمایہ کاری سے حاصل ہونے والی آمدنی کو ریلوے نظام کی بہتری کے لیے استعمال کیا جانا چاہیے۔

وزیراعظم شہباز شریف نے زور دیتے ہوئے کہا کہ پاکستان ریلوے کی ترقی علاقائی رابطوں کے لیے نہایت اہم ہے اور یہ ملک بھر میں معاشی سرگرمیوں میں اضافے کے لیے ایک محرک کے طور پر کام کرے گی۔

اجلاس میں وفاقی وزراء، جن میں احسن اقبال، احد خان چیمہ، محمد حنیف عباسی، نجکاری کے مشیر محمد علی، وزیر مملکت برائے خزانہ بلال اظہر کیانی اور متعلقہ محکموں کے سینئر حکام نے شرکت کی۔