نائب وزیراعظم اسحاق ڈار رواں ہفتے چین کی زیر صدارت یو این سیکورٹی کونسل کے مباحثے میں شرکت کریں گے

دفتر خارجہ نے پیر کو اعلان کیا ہے کہ نائب وزیراعظم اور وزیر خارجہ سینیٹر محمد اسحاق ڈار تین روزہ سرکاری دورے پر بیجنگ سے نیویارک روانہ ہوں گے۔

26 سے 28 مئی تک جاری رہنے والے اس دورے کے دوران وہ منگل کو اقوام متحدہ کی سلامتی کونسل (یو این ایس سی) کے کھلے مباحثے میں شرکت کریں گے، جس کا عنوان ہے:“ ”بین الاقوامی امن و سلامتی کا تحفظ: اقوام متحدہ کے چارٹر کے مقاصد اور اصولوں کی پاسداری اور اقوام متحدہ مرکوز بین الاقوامی نظام کو مضبوط بنانا۔“

یہ مباحثہ چین کی سلامتی کونسل کی گردشی صدارت کے تحت منعقد کیا جا رہا ہے، جبکہ اس کی صدارت چینی وزیر خارجہ وانگ یی کریں گے۔

دفتر خارجہ کے مطابق پاکستان چین کی اس پہل کا خیرمقدم کرتا ہے اور کثیرالجہتی نظام کو مضبوط بنانے اور عالمی چیلنجز سے نمٹنے میں اقوام متحدہ کے مرکزی کردار کی اہمیت پر زور دیتا ہے۔

جمعرات کو اسحاق ڈار گروپ آف فرینڈز آن گلوبل گورننس کے اجلاس میں شرکت کریں گے، جس میں عالمی طرزِ حکمرانی کے ڈھانچے میں اصلاحات اور بہتری پر توجہ مرکوز کی جائے گی۔

اس موقع پر وہ اپنے ہم منصبوں اور اقوام متحدہ کے سینئر حکام سے دو طرفہ ملاقاتیں بھی کریں گے۔

دفتر خارجہ نے کہا کہ ”پاکستان کثیرالجہتی نظام کی مضبوط حمایت جاری رکھے ہوئے ہے اور عالمی امن، سلامتی اور ترقی کے لیے اجتماعی کوششوں میں تعمیری کردار ادا کرنے کے لیے تیار ہے۔“

ڈار اس وقت وزیراعظم شہباز شریف اور دیگر اعلیٰ شخصیات کے ہمراہ چین کے سرکاری دورے پر ہیں۔