وائٹ ہاؤس کے عشائیے میں فائرنگ، صدر ٹرمپ محفوظ، ملزم گرفتار

امریکی صدر ڈونلڈ ٹرمپ اور خاتونِ اول میلانیا ٹرمپ کو ہفتے کی شب وائٹ ہاؤس کورسپونڈنٹس ایسوسی ایشن کے عشائیے کے دوران اس وقت ہنگامی طور پر باہر نکال لیا گیا جب ایک مسلح شخص نے سیکیورٹی اہلکاروں پر فائرنگ کر دی۔

حکام کے مطابق حملہ آور نے شاٹ گن کے ذریعے ایک سیکیورٹی چیک پوائنٹ پر تعینات اہلکار کو نشانہ بنایا۔ تاہم صدر ٹرمپ نے بعد ازاں میڈیا سے گفتگو میں بتایا کہ متاثرہ اہلکار بلٹ پروف جیکٹ کی بدولت محفوظ رہا اور اس کی حالت خطرے سے باہر ہے۔ ملزم کو فوری طور پر گرفتار کر لیا گیا جبکہ تقریب میں موجود تمام وفاقی حکام محفوظ رہے۔

صدر ٹرمپ نے واقعے کے بعد پریس کانفرنس میں کہا کہ حملہ آور ایک بیمار ذہن کا حامل شخص تھا جو متعدد ہتھیاروں کے ساتھ سیکیورٹی حصار کی طرف تیزی سے بڑھا، تاہم سیکیورٹی اہلکاروں نے بروقت کارروائی کرتے ہوئے اسے قابو کر لیا۔ انہوں نے مزید کہا کہ ابتدائی تحقیقات کے مطابق حملہ آور لون وولف تھا جو اکیلا ہی کارروائی کر رہا تھا۔

تقریب کے دوران فائرنگ کی آواز سنتے ہی شرکا میں خوف و ہراس پھیل گیا، لوگ چیخنے لگے اور نیچے جھک جاؤ کی آوازیں گونجنے لگیں۔ تقریباً 2600 افراد پر مشتمل ہال میں موجود مہمانوں نے فوراً پناہ لی جبکہ ویٹرز بھی محفوظ مقامات کی طرف بھاگ گئے۔

سیکیورٹی اہلکاروں نے متعدد اعلیٰ حکام کو زمین پر لٹا دیا جن میں وزیر خارجہ مارکو روبیو، وزیر صحت رابرٹ ایف کینیڈی جونیئر اور وزیر داخلہ ڈگ برگم شامل تھے۔ بعد ازاں صدر ٹرمپ اور ان کی اہلیہ کو فوری طور پر محفوظ مقام پر منتقل کر دیا گیا۔

یاد رہے کہ صدر ٹرمپ 2024 میں انتخابی مہم کے دوران دو قاتلانہ حملوں کا سامنا کر چکے ہیں، جن میں سب سے سنگین حملہ پنسلوینیا میں ایک جلسے کے دوران ہوا تھا جہاں وہ زخمی بھی ہوئے تھے۔