طاقت کے زور پر آبنائے ہرمز کھلوانا غیر حقیقی ہے، فرانسیسی صدر

فرانسیسی صدر ایمانوئل میکخواں نے کہا ہے کہ آبنائے ہرمز کو فوجی طاقت کے ذریعے کھلوانا غیر حقیقی سوچ ہے، ان کا یہ بیان امریکی صدر ڈونلڈ ٹرمپ کی جانب سے اتحادیوں کو آبی گزرگاہ کھلوانے کے چیلنج کے جواب میں سامنے آیا ہے۔

28 فروری کو ایران پر امریکہ اور اسرائیل کے حملوں کے بعد شروع ہونے والے تنازع میں اب تک ہزاروں افراد ہلاک ہو چکے ہیں، جبکہ تہران نے عالمی تیل اور گیس کی سپلائی کے لیے اہم اس راستے کو بند کر رکھا ہے۔

جنوبی کوریا کے دورے کے دوران صحافیوں سے گفتگو کرتے ہوئے ایمانوائل میکخواں نے کہا کہ کچھ حلقے فوجی آپریشن کے ذریعے آبنائے ہرمز کو آزاد کرانے کی حمایت کر رہے ہیں، لیکن فرانس نے کبھی اس آپشن کی تائید نہیں کی کیونکہ یہ انتہائی خطرناک ثابت ہو سکتا ہے۔ ان کا کہنا تھا کہ ایسی کسی بھی مہم جوئی میں طویل وقت لگے گا اور وہاں سے گزرنے والے جہازوں کو ایرانی پاسدارانِ انقلاب اور بیلسٹک میزائلوں کے سنگین خطرات لاحق ہوں گے۔

میکخواں نے واضح کیا کہ آبنائے ہرمز کی بحالی صرف ایران کے ساتھ مشاورت اور مذاکرات کے ذریعے ہی ممکن ہے۔ انہوں نے نیٹو اور دیگر اتحادیوں پر ٹرمپ کی تنقید کے حوالے سے کہا کہ وہ امریکہ اور اسرائیل کے اپنے طور پر کیے گئے فیصلوں پر تبصرہ نہیں کرنا چاہتے۔ انہوں نے مزید کہا کہ ٹرمپ کی جانب سے ان کی اہلیہ سے متعلق نازیبا ریمارکس اس حساس وقت کے لحاظ سے بالکل بھی مناسب نہیں تھے۔