آئی پی ایل 2026 سے قبل میتھیو ہیڈن گجرات ٹائٹنز کے بیٹنگ کوچ مقرر

آسٹریلیا کے سابق عظیم کھلاڑی میتھیو ہیڈن کو انڈین پریمیئر لیگ (آئی پی ایل) کے آئندہ سیزن کے لیے گجرات ٹائٹنز کا بیٹنگ کوچ مقرر کر دیا گیا ہے، فرنچائز نے منگل کو اس کا باضابطہ اعلان کیا۔

دو بار کے ورلڈ کپ فاتح بیٹر ہیڈن نے تمام فارمیٹس کے 273 بین الاقوامی میچوں میں آسٹریلیا کی نمائندگی کی، جہاں انہوں نے 15,000 سے زائد انٹرنیشنل رنز بنائے اور اپنے جارحانہ کھیل کی بدولت ایک منفرد پہچان بنائی۔

ہیڈن نے ایک بیان میں کہا کہ اچھی بیٹنگ دباؤ ڈالتی ہے، جبکہ بہترین بیٹنگ کھیل پر قابو پاتی ہے گجرات ٹائٹنز میں ہم یہی معیار قائم کرنا چاہتے ہیں۔ ہیڈن نے آئی پی ایل میں چنئی سپر کنگز کے لیے 32 میچ کھیلے اور 2010 میں انہیں ٹائٹل جتوانے میں اہم کردار ادا کرتے ہوئے اپنا سفر مکمل کیا۔

انہوں نے 2009 میں 12 میچوں میں 572 رنز بنا کر آرینج کیپ (سب سے زیادہ رنز بنانے کا اعزاز) بھی جیتی تھی۔

گجرات ٹائٹنز کے ڈائریکٹر کرکٹ وکرم سولنکی نے مزید کہا کہ میتھیو کا اعلیٰ ترین سطح کا تجربہ اور ابھرتے ہوئے ٹیلنٹ کی رہنمائی کرنے کی صلاحیت، آنے والے سیزن میں ہماری بیٹنگ کی پہچان بنانے میں کلیدی ثابت ہو گی۔ آئی پی ایل 2026 کا آغاز 28 مارچ سے ہوگا۔