سٹی فارما کی نظریں ویٹرنری ذیلی کمپنی کے آئی پی او پر، 1 سے 2 ارب اکٹھے کرنے کا ہدف

پاکستان کی صفِ اول کی دوا ساز کمپنیوں میں سے ایک سٹی فارما لمیٹڈ نے اپنی ملکیتی ذیلی کمپنی سٹی ویٹرنری فارما لمیٹڈ کیلئے انیشل پبلک آفرنگ (آئی پی او) کے اجرا کی منظوری دے دی ہے۔

دوا ساز کمپنی نے منگل کو اسٹاک ایکسچینج کو جاری کردہ ایک نوٹس میں اس پیشرفت سے آگاہ کیا جو کہ کمپنی کی اپنی آمدنی کے ذرائع کو متنوع بنانے کی حکمت عملی کا حصہ ہے۔

نوٹس میں کہا گیا کہ سٹی فارما کے بورڈ آف ڈائریکٹرز نے کمپنی کی مکمل ملکیتی ذیلی کمپنی سٹی ویٹرنری فارما لمیٹڈ (سی وی پی ایل) کے آئی پی او کے آغاز کی منظوری دے دی ہے۔

سی وی پی ایل کو ایک مخصوص ادارے کے طور پر قائم کیا گیا جس کی توجہ مقامی مارکیٹ کی ضرورت کے مطابق ویٹرنری (جانوروں) کے لیے خام مال اور دوا سازی کی مصنوعات کی تیاری پر مرکوز ہے۔

نوٹس میں مزید کہا گیا کہ اس سلسلے میں بورڈ نے کے ٹریڈ سیکیورٹیز لمیٹڈ کو کنسلٹنٹ (مشیر) مقرر کرنے کی منظوری دے دی تاکہ کمپنی کے حصص کے اجراء اور اسے جلد از جلد اسٹاک ایکسچینج میں لسٹ کروانے کے عمل کو مکمل کیا جا سکے۔

سٹی فارما نے یہ بھی بتایا کہ وہ اس آئی پی او کے ذریعے 1 سے 2 ارب روپے تک کا سرمایہ اکٹھا کرنے کا ارادہ رکھتی ہے۔

دوا ساز کمپنی نے مزید کہا کہ سٹی فارما لمیٹڈ کے لیے دوا سازی سے متعلقہ شعبے میں تنوع لا کر اپنی آمدنی کے ذرائع بڑھانے کی سمت میں ایک اہم سنگ میل ہے۔ یہ بات بھی قابلِ ذکر ہے کہ سٹی فارما مالی سال 2026 میں ویٹرنری مصنوعات کی تجارت کے ذریعے تقریباً 1.50 ارب روپے کی آمدنی حاصل کرنے کا منصوبہ رکھتی ہے۔

پچھلے ماہ سٹی فارما نے سیکیورٹیز اینڈ ایکسچینج کمیشن آف پاکستان سے اپنی مکمل ملکیتی ریٹ مینجمنٹ ذیلی کمپنی قائم کرنے کی منظوری حاصل کرنے کے بعد باضابطہ طور پر پاکستان کے ریئل اسٹیٹ سیکٹر میں قدم رکھا۔ یہ اقدام کمپنی کے بنیادی فارماسیوٹیکل کاروبار سے ہٹ کر اسٹریٹجک تنوع کی علامت ہے۔

سٹی فارما نے بتایا کہ سٹی ریٹ مینجمنٹ کمپنی (پرائیویٹ) لمیٹڈ کے مجوزہ پلیٹ فارم کے تحت کمپنی ریئل اسٹیٹ ڈویلپمنٹ کے تین بڑے منصوبے شروع کرنے کا ارادہ رکھتی ہے۔