پاکستان کا سرحد پر افغان طالبان کی فائرنگ کا ’فوری، مؤثر جواب

پاکستان کی سیکورٹی فورسز نے جمعرات کے روز خیبر پختونخوا میں پاکستان اور افغانستان سرحد کے مختلف مقامات پر افغان طالبان کی جانب سے مبینہ بلاوجہ فائرنگ کے جواب میں ’فوری اور موثر جواب‘ دیا ہے۔

وزارتِ اطلاعات نے ایکس پر جاری بیان میں کہا ہے کہ افغان طالبان نے ’’غلط اندازہ لگا کر خیبر پختونخوا میں پاکستان اور افغانستان سرحد کے متعدد مقامات پر بلاوجہ فائرنگ کی، جس کا فوری اور مؤثر جواب پاکستان کی سکیورٹی فورسز دے رہی ہیں۔“

فائرنگ کا تبادلہ چترال، خیبر، مہمند، کرم اور باجوڑ سیکٹرز میں ہوا، جہاں پاکستانی فورسز نے دشمن کے ٹھکانوں کو نشانہ بنایا۔

وزارتِ اطلاعات نے کہا ہے کہ ”ابتدائی رپورٹوں سے افغان جانب بھاری جانی نقصان کی تصدیق ہوئی ہے اور متعدد چوکیاں اور ساز و سامان تباہ ہوئے ہیں۔ پاکستان اپنی علاقائی سالمیت اور اپنے شہریوں کے تحفظ کو یقینی بنانے کے لیے تمام ضروری اقدامات کرے گا۔“

سیکورٹی ذرائع نے اس پیش رفت کی تصدیق کرتے ہوئے بتایا کہ پاکستانی فورسز نے جوابی کارروائی کے دوران درست نشانہ بازی کی، جس میں چترال سیکٹر میں طالبان کی ایک چیک پوسٹ اور باجوڑ کے علاقے ناوگئی میں دو افغان پوسٹیں تباہ کی گئیں۔

ذرائع کے مطابق عسکریت پسندوں کے ٹھکانے مکمل طور پر تباہ ہو گئے، جس کے نتیجے میں جنگجو پسپا ہونے پر مجبور ہوئے۔

سیکورٹی حکام کا کہنا تھا کہ پاکستانی مسلح افواج سرحد کے دفاع کے لیے مکمل تیار ہیں اور کسی بھی مزید جارحیت کا فیصلہ کن جواب دیں گی۔

حالیہ مہینوں میں سرحد پار عسکریت پسندی اور بار بار سیکورٹی کے واقعات کے خدشات کے باعث پاکستان اور افغانستان کی سرحد پر کشیدگی میں اضافہ ہوا ہے۔