تیل کی قیمتیں مستحکم، سرمایہ کار اوپیک پلس کی سپلائی اور امریکی مہنگائی کے اعداد و شمار پر غور کر رہے ہیں

جمعہ کو امریکی مہنگائی کے اعداد و شمار کے بعد تیل کی قیمتیں مستحکم رہیں، اور اس سے پہلے اوپیک پلس کی پیداوار میں اضافے کی ممکنہ بحالی کی خبریں آنے کے بعد قیمتیں گرنے کے بعد بحالی دیکھنے میں آئی ہے۔

برنٹ کروڈ فیوچرز 1424 جی ایم ٹی پر 9 سینٹ یا 0.13 فیصد کے اضافے کے ساتھ 67.61 ڈالر فی بیرل پر پہنچ گئے۔ اسی وقت، امریکی ویسٹ ٹیکسس انٹرمیڈیٹ ( ڈبلیو ٹی آئی ) کروڈ گزشتہ بند ہونے والی قیمت 62.84 ڈالر پر مستحکم رہا۔

دونوں تیل کے معیارات ہفتہ وار خسارے کی راہ پر تھے کیونکہ جمعرات کو دونوں نے تقریباً 3 فیصد نقصان اٹھایا تھا۔ برنٹ کا ہفتہ وار نقصان 0.6 فیصد اور ڈبلیو ٹی آئی کا 1.1 فیصد تک پہنچنے کا امکان ہے۔

قیمتیں سیشن کے آغاز میں گر گئیں جب سرمایہ کاروں نے رائٹرز کی رپورٹ پر ردعمل ظاہر کیا کہ اوپیک اپریل سے تیل کی پیداوار میں اضافے کی بحالی کی طرف جھکاؤ رکھتا ہے، جو آنے والی گرمیوں کی بلند طلب سے قبل ہے اور امریکا، ایران تعلقات میں کشیدگی کے سبب تیل کی مضبوط قیمتوں کے درمیان سامنے آیا۔

ساکسو بینک کے تجزیہ کار اولے ہینسن نے کہا ہے کہ ”اوپیک کی پیداوار میں تبدیلی کے اشارے ہمیشہ توجہ طلب ہوتے ہیں، خاص طور پر جب یہ توقع کے برخلاف ہوں۔“

برنٹ فیوچرز نے اس خبر پر دن کے اندر سب سے کم سطح 66.89 ڈالر فی بیرل تک چھوا، مگر بعد میں بحالی کی کوشش کی۔

یو بی ایس کے تجزیہ کار جیووانی اسٹاونوو کے مطابق قیمتوں کی بحالی امریکی صارف قیمتوں کے اعداد و شمار کی وجہ سے آئی، جو امریکہ میں مزید شرح سود میں کمی کے امکانات کو تقویت دے سکتے ہیں اور سرمایہ کاری کے رسک کو برداشت کرنے کی صلاحیت کو بڑھا سکتے ہیں۔

اعداد و شمار سے ظاہر ہوا کہ جنوری میں امریکی صارف قیمتیں توقع سے کم بڑھی ہیں۔

امریکہ اور ایران کے تعلقات میں کشیدگی کے باعث رواں ہفتے تیل کی قیمتیں مستحکم ہوئی تھیں کیونکہ خدشات تھے کہ امریکہ مشرقِ وسطیٰ کے تیل پیدا کرنے والے ملک ایران پر اس کے جوہری پروگرام کے سلسلے میں حملہ کر سکتا ہے، لیکن جمعرات کو امریکی صدر ڈونلڈ ٹرمپ کے ایران کے ساتھ اگلے ماہ تک معاہدہ کرنے کے بیان نے قیمتوں کو نیچے دھکیل دیا۔

مشرقِ وسطیٰ سے ہٹ کر، روس نے جمعہ کو کہا ہے کہ یوکرین کے مسئلے پر امن مذاکرات کا اگلا دور آئندہ ہفتے ہوگا۔

وائٹ ہاؤس کے توانائی سے متعلق ایک عہدیدار نے جمعرات کو کہا ہے کہ رواں ہفتے امریکی خزانہ وینیزویلا کی توانائی پر پابندیوں میں نرمی کے لیے مزید اجازت نامے جاری کرے گا۔

امریکی وزیر توانائی کرس رائٹ نے جمعرات کو کہا ہے کہ وینیزویلا سے امریکی کنٹرول والے تیل کی فروخت جنوری کے بعد سے ایک ارب ڈالر سے تجاوز کر گئی ہے اور آئندہ چند ماہ میں مزید 5 ارب ڈالرکی آمد متوقع ہے۔