ٹیکس ورلڈ پیرس 2026 : پاکستانی ٹیکسٹائل مصنوعات کی عالمی نمائش

پیرس کے لی بورجٹ ایگزیبیشن سینٹر میں منعقدہ ٹیکس ورلڈ پیرس 2026 کے بہار ایڈیشن میں پاکستان کے چار بڑے مینوفیکچررز اور ایکسپورٹرز نے شرکت کی۔ اس تین روزہ عالمی نمائش نے پاکستانی برآمد کنندگان کو بین الاقوامی خریداروں کے ساتھ تعلقات مضبوط بنانے اور اپنی صلاحیتیں دکھانے کیلئے بہترین پلیٹ فارم مہیا کیا۔

اپنے 58 ویں ایڈیشن میں ٹیکس ورلڈ نے ٹیکسٹائل کے بڑے مراکز جیسے چین، ترکیہ اور بنگلہ دیش کے ساتھ پاکستان کی اہمیت کو بھی اجاگر کیا۔ اس سال 33 ممالک کی 1,100 سے زائد کمپنیوں نے اپنی مصنوعات پیش کیں۔ پاکستان کی جانب سے گلوبل ٹیکسٹائل ہولڈنگز، ایم آر آئی گروپ، تھریڈز اینڈ سیو اور عمر گارمنٹس نے اپنی مصنوعات کی نمائش کی، جو پاکستان کی معیاری پیداوار اور ہنرمندی کی عکاسی کرتی ہیں۔

گلوبل ٹیکسٹائل نیٹ ورکس کے سی ای او فراز ملک نے پہلی بار شرکت پر خوشی کا اظہار کرتے ہوئے کہا کہ خریداروں کا ردعمل نہایت حوصلہ افزا رہا، جس سے ہمیں نئے گاہکوں تک رسائی اور پاکستان کی ٹیکسٹائل صلاحیتوں کو فروغ دینے کا موقع ملا۔