نیوزی لینڈ کے خلاف ابھیشیک کی دھواں دھار بیٹنگ، بھارت نے ٹی 20 سیریز اپنے نام کر لی
- سوریا کمار یادیو کی برق رفتار بیٹنگ، مسلسل دوسری ففٹی کے لیے صرف 25 گیندوں کا سہارا لیا
بھارت نے نیوزی لینڈ کے خلاف پانچ میچوں کی ٹی 20 سیریز میں 3-0 کی فیصلہ کن برتری حاصل کر لی۔ گوہاٹی میں کھیلے گئے تیسرے میچ میں اوپنر ابھیشیک شرما کی محض 20 گیندوں پر 68 رنز کی ناقابلِ شکست اننگز کی بدولت بھارت نے 8 وکٹوں سے فتح سمیٹی۔
میزبان ٹیم نے ٹاس جیت کر پہلے فیلڈنگ کا فیصلہ کیا اور جسپریت بمراہ کی تباہ کن باؤلنگ (14 رنز کے عوض 3 وکٹیں) کی مدد سے نیوزی لینڈ کو صرف 153 رنز تک محدود کر دیا۔
ہاردک پانڈیا نے ڈیوون کونوے کا شاندار کیچ پکڑ کر اور راچن رویندر کو آؤٹ کر کے کیویز کی کمر توڑ دی، جبکہ بمراہ نے پہلی ہی گیند پر ٹم سیفرٹ کی وکٹیں بکھیر دیں۔ نیوزی لینڈ کی جانب سے گلین فلپس 48 رنز بنا کر نمایاں رہے۔
جواب میں بھارتی بلے بازوں نے 154 رنز کا ہدف محض 10 اوورز میں حاصل کر لیا۔ ابھیشیک شرما نے صرف 14 گیندوں پر نصف سنچری مکمل کی، جو یوراج سنگھ (12 گیندوں) کے بعد کسی بھی بھارتی کھلاڑی کی دوسری تیز ترین ففٹی ہے۔
کپتان سوریا کمار یادو نے بھی جارحانہ مزاج برقرار رکھا اور 26 گیندوں پر 57 رنز بنا کر ناقابلِ شکست رہے۔ سنجو سیمسن کے صفر پر آؤٹ ہونے کے باوجود ابھیشیک اور سوریا کی پارٹنرشپ نے کیوی باؤلرز کا بھرکس نکال دیا، جس سے اگلے ماہ ہونے والے ٹی 20 ورلڈ کپ کے لیے بھارتی ٹیم کے دفاعی عزائم مزید مستحکم ہو گئے ہیں۔
Comments
Comments are closed.