روسی حملے کے بعد کیف کی 1,700 عمارتیں ہیٹنگ سے محروم

یوکرین کے دارالحکومت کیف میں روسی میزائل اور ڈرون حملوں کے بعد تقریباً 1,700 اپارٹمنٹ عمارتیں تاحال ہیٹنگ سے محروم ہیں۔ کیف کے میئر ویتالی کلیچکو نے اتوار کو اس صورتحال کی تصدیق کرتے ہوئے کہا کہ شہریوں کو شدید سردی میں مشکلات کا سامنا ہے۔

روس نے 2022 میں یوکرین پر حملے کے بعد سے ملک کے توانائی کے نظام کو مسلسل نشانہ بنایا ہے، تاہم حالیہ دنوں میں ان حملوں میں نمایاں شدت دیکھنے میں آئی ہے۔ ہفتے کے روز روس نے یوکرین کے توانائی کے ڈھانچے پر ایک بڑا حملہ کیا، جس کے دوران رات بھر کیف میں دھماکوں کی آوازیں سنائی دیتی رہیں۔ ملک بھر میں منفی درجہ حرارت کے دوران تقریباً 12 لاکھ املاک بجلی سے محروم ہو گئیں۔

یوکرینی صدر وولودیمیر زیلنسکی نے سوشل میڈیا پر بیان میں کہا کہ روس اس وقت یوکرین کے توانائی کے شعبے، اہم انفراسٹرکچر اور رہائشی عمارتوں کو نشانہ بنا رہا ہے۔ ان کے مطابق صرف اسی ہفتے روس نے یوکرین پر 1,700 سے زائد حملہ آور ڈرونز، 1,380 سے زیادہ گائیڈڈ فضائی بم اور 69 میزائل داغے۔ صدرزیلنسکی نے خبردار کیا کہ روس کا ہر بڑا حملہ تباہ کن اثرات مرتب کر سکتا ہے۔ وہ اتوار کو لتھوانیا کے دورے پر تھے جہاں انہوں نے عالمی رہنماؤں سے یوکرین کی حمایت مضبوط بنانے پر زور دیا۔

نائب وزیر اعظم اولیکسی کولیبا نے بتایا کہ ہفتہ کی شام تک کیف کی 3,200 سے زائد عمارتیں ہیٹنگ سے محروم تھیں، جو صبح کے وقت 6,000 کے قریب تھیں۔ کلیچکو کے مطابق یوٹیلیٹی عملہ اور توانائی کمپنیاں اب تک 1,600 سے زیادہ عمارتوں میں ہیٹنگ بحال کر چکی ہیں اور کام تیزی سے جاری ہے۔

یہ بڑے پیمانے کا حملہ ایسے وقت میں ہوا جب یوکرینی، روسی اور امریکی نمائندے ابوظہبی میں جنگ کے خاتمے کے امکانات پر بات چیت کر رہے تھے۔