کپاس کی بحالی کے لیے پاکستان کاٹن بورڈ کے قیام کی تجویز

پنجاب کے وزیر زراعت سید عاشق حسین کرمانی اور سیکرٹری زراعت افتخار علی سہو نے بدھ کو ایپٹما لاہور کے دفتر کا دورہ کیا۔ اس موقع پر چیئرمین ایپٹما کامران ارشد نے وفد کو ٹیکسٹائل سیکٹر کی معاشی اہمیت اور ملکی کپاس کی پیداوار میں کمی سے پیدا ہونے والے سنگین بحران پر بریفنگ دی۔ انہوں نے خبردار کیا کہ اگر ہنگامی اقدامات نہ کیے گئے تو پاکستان سے کپاس کی کاشت ختم ہو سکتی ہے۔

ایپٹما نے شراکت داروں کے ساتھ مل کر ایک ’کاٹن ریوائیول روڈ میپ‘ تیار کیا ہے، جس کے تحت ایک مرکزی تحقیقی ادارے ’پاکستان کاٹن بورڈ‘ کا قیام تجویز کیا گیا ہے۔ چیئرمین نارتھ اسد شفیع نے کہا کہ اگر توانائی اور خام مال کی قیمتیں مسابقتی ہوں تو ٹیکسٹائل برآمدات دوگنا کی جا سکتی ہیں۔ اجلاس کو بتایا گیا کہ نائب وزیراعظم کی سربراہی میں کابینہ کمیٹی پہلے ہی ایپٹما کے اس بحالی پلان پر عملدرآمد کی ہدایات جاری کر چکی ہے۔

وزیر زراعت سید عاشق حسین کرمانی نے ایپٹما کے اقدامات کو سراہتے ہوئے مکمل تعاون کا یقین دلایا۔ انہوں نے کہا کہ پنجاب کپاس کی پیداوار میں مزید کمی کا متحمل نہیں ہو سکتا۔ حکومت امریکہ اور چین کے ساتھ مل کر موسمیاتی تبدیلیوں کے خلاف مزاحمت رکھنے والے بیج تیار کر رہی ہے۔

سیکرٹری زراعت نے تصدیق کی کہ پنجاب نے 2026 کے لیے کپاس کی حکمت عملی وقت سے پہلے ہی فائنل کر لی ہے اور ایک مرکزی قومی ادارے کا قیام ہی اس مسئلے کا پائیدار حل ہے۔