جاز انٹرنیشنل ہولڈنگ ٹی پی ایل انشورنس میں کنٹرولنگ شیئر حاصل کرے گی

جاز انٹرنیشنل ہولڈنگ لمیٹڈ کو ٹی پی ایل انشورنس لمیٹڈ کے حصص اور انتظامی کنٹرول کے نئے خریدار کے طور پر حتمی طور پر نامزد کردیا گیا ہے جس کے تحت پہلے اعلان کردہ ویون گروپ ہولڈنگ کمپنی لمیٹڈ اور اس سے منسلک اداروں کی جگہ جاز انٹرنیشنل ہولڈنگ لے گی۔

یہ پیشرفت منگل کو عارف حبیب لمیٹڈ (اے ایچ ایل) کی جانب سے جو آفر کے منیجر کے طور پر کام کر رہا ہے، پبلک اناؤنسمنٹ آف انٹینشن کے ذریعے پاکستان اسٹاک ایکسچینج (پی ایس ایکس) کو آگاہ کی گئی۔

اعلان کے مطابق، ہدف کمپنی کے حصص اور انتظامی کنٹرول کے حصول کے لیے خریدار کے طور پر جاز انٹرنیشنل ہولڈنگ کی تصدیق کر دی گئی ہے، جبکہ پاکستان موبائل کمیونیکیشنز لمیٹڈ کو ہم آہنگ فریقین (Persons Acting in Concert) کے طور پر شامل کیا گیا ہے۔

اس سے قبل ستمبر میں ٹی پی ایل کارپ لمیٹڈ کے بورڈ آف ڈائریکٹرز نے اصولی منظوری دی تھی کہ نیسڈیک میں درج ویون لمیٹڈ کی ذیلی کمپنی، ویون گروپ ہولڈنگ کمپنی لمیٹڈ، اس کی ذیلی کمپنی ٹی پی ایل انشورنس کے حصص اور انتظامی کنٹرول حاصل کرے۔

قابل ذکر بات یہ ہے کہ جاز انٹرنیشنل ہولڈنگ، ویون لمیٹڈ کی ذیلی کمپنی ہے، لہٰذا ویون گروپ حتمی مستفید مالک کے طور پر برقرار رہے گا۔

ٹی پی ایل کارپ لمیٹڈ ٹی پی ایل انشورنس میں 52.87 فیصد شیئر ہولڈنگ کے ساتھ اکثریتی شیئر ہولڈر ہے، جس کے بعد فن لینڈ کے فنڈ فار انڈسٹریل کوآپریشن لمیٹڈ 17.02 فیصد اور اینٹ وِکِلٹ گیسلشافت ایم بی ایچ 15.87 فیصد کے ساتھ شامل ہیں ۔ کمپنی کا کل ادا شدہ سرمایہ 198.39 ملین شیئرز پر مشتمل ہے۔

ٹی پی ایل انشورنس نے 30 جون 2025 تک کل اثاثوں کی مالیت 8.46 ارب روپے اور شیئر ہولڈرز کی ایکویٹی 2.68 ارب روپے رپورٹ کی۔ کمپنی نے 2025 کی پہلی ششماہی میں 12 ملین روپے کا خسارہ ظاہر کیا جبکہ 2024 میں اس کا منافع 72 ملین روپے تھا۔

ویون گروپ، جس کا ہیڈکوارٹر دبئی میں ہے، پانچ ممالک میں کام کرتا ہے جن میں پاکستان، یوکرین، قازقستان، ازبکستان اور بنگلہ دیش شامل ہیں۔

پاکستان میں ویون گروپ کا مضبوط آپریشنل اثر پاکستان موبائل کمیونیکیشنز لمیٹڈ (جو برانڈ جاز کے تحت کام کر رہی ہے) کے ذریعے ہے جو ملک کا معروف موبائل آپریٹر ہے اور اس کے 70 ملین سے زائد صارفین ہیں۔