الیکٹرک آئیکون قرار دی جانے والی ایس جی ایم ڈبلیو بینگو ای وی پاکستان میں متعارف

ایم جی پاکستان نے جے ڈبلیو اسپیشل اکنامک زون (جے ڈبلیو ایس ای زیڈ) کے اشتراک سے ایس جی ایم ڈبلیو بینگو ای وی متعارف کرانے کا اعلان کیا ہے۔ یہ بی سیگمنٹ الیکٹرک ہیچ بیک گاڑی ایس اے آئی سی جی ایم وولنگ نے تیار کی ہے۔ ایم جی بینگو ای وی کی متوقع ریٹیل قیمت 59 لاکھ 99 ہزار روپے رکھی گئی ہے، جبکہ بکنگ 12 لاکھ روپے ایڈوانس پر شروع کر دی گئی ہے۔ گاڑی کی ڈیلیوری 2026 کی پہلی سہ ماہی میں متوقع ہے۔

اس گاڑی کو پاکستان آٹو پارٹس شو (پی اے پی ایس) اور منتخب ڈیلرشپس میں عوامی نمائش کے لیے پیش کیا گیا ،تاکہ صارفین کے ردِعمل اور مارکیٹ کی قبولیت کا جائزہ لیا جا سکے۔ یہ لانچ حکومت کی نیو انرجی وہیکلز پالیسی 2025–2030 سے ہم آہنگ ہے، جس کے تحت 2030 تک 30 فیصد اور 2040 تک 90 فیصد نئی گاڑیوں کو الیکٹرک بنانے کا ہدف مقرر کیا گیا ہے۔

ایم جی پاکستان کے ترجمان کے مطابق بینگو ای وی جسے “الیکٹرک آئیکون” کہا جا رہا ہے، شہری صارفین کے لیے الیکٹرک موبیلیٹی کو قابلِ رسائی بنانے کی کوشش ہے۔ جے ڈبلیو ایس ای زیڈ کے نمائندے نے کہا کہ یہ شراکت داری ای وی پالیسی کے اہداف، ایندھن پر انحصار میں کمی اور ماحولیاتی آلودگی کے خاتمے میں مدد دے گی۔

بینگو ای وی میں 31.9 کلو واٹ آور بیٹری دی گئی ہے جو ایک چارج پر 333 کلومیٹر تک رینج فراہم کرتی ہے۔ گاڑی میں جدید ڈیزائن، ڈوئل اسکرین ڈسپلے، آرام دہ انٹیریئر اور جدید حفاظتی فیچرز شامل ہیں۔ یہ ماڈل شہری استعمال کے لیے ایک موزوں اور قدر کے لحاظ سے پرکشش الیکٹرک آپشن ثابت ہو سکتا ہے۔