خیبر پختونخوا میں سیکیورٹی فورسز کا کامیاب آپریشن ، 13 خوارج ہلاک

سیکورٹی فورسز نے 12 اور 13 دسمبر کو خیبر پختونخوا کے مختلف اضلاع میں خفیہ اطلاعات پر دو الگ الگ آپریشنز کے دوران 13 دہشتگردوں کو ہلاک کر دیا، جو “انڈین پراکسی فتنہ الخوارج” سے تعلق رکھتے تھے۔

آئی ایس پی آر کے مطابق موہمند ڈسٹرکٹ میں خوارج کی موجودگی کی اطلاع پر آپریشن کیا گیا، جس میں سات دہشتگرد ہلاک ہوئے۔ اسی طرح بنوں ڈسٹرکٹ میں ایک اور آپریشن کے دوران چھ دہشتگرد واصل جہنم کیے گئے۔

آئی ایس پی آر نے بتایا کہ علاقے میں باقی ممکنہ دہشتگردوں کے خاتمے کے لیے آپریشن جاری ہیں اور قومی انسداد دہشتگردی مہم “عزمِ استحکام” کے تحت غیر ملکی معاونت یافتہ دہشتگردی کے خلاف کارروائیاں تیز رفتار سے جاری رہیں گی۔

صدر آصف علی زرداری اور وزیراعظم محمد شہباز شریف نے سیکیورٹی فورسز کی کامیابی پر انہیں خراج تحسین پیش کیا۔ صدر نے بلوچستان میں دہشتگردوں کے خلاف کامیاب آپریشنز میں فورسز اور پولیس کی خدمات کو بھی سراہا اور کہا کہ پاکستان کی خودمختاری کی حفاظت اولین ترجیح ہے۔

وزیراعظم نے کہا کہ عزمِ استحکام کے تحت سیکیورٹی فورسز دہشتگردی کے خلاف بڑے کامیاب اقدامات کر رہی ہیں اور پورا ملک پاکستان آرمی کے شانہ بشانہ دہشتگردی کے خاتمے کے لیے متحد ہے۔