پاک قطر فیملی تکافل نے اسٹاک ایکسچینج میں اپنی ابتدائی عوامی پیشکش کے ذریعے 901 ملین روپے جمع کرلیے

پاک قطر فیملی تکافل لمیٹڈ ( پی کیو ایف ٹی ایل ) نے اپنی دو روزہ ڈچ بیڈنگ کے عمل کے اختتام پر 50 ملین شیئرز کی فروخت کے لیے فی شیئر 18.02 روپے کا حتمی ہدف مقرر کیا، جس سے پاکستان اسٹاک ایکسچینج ( پی ایس ایکس ) پر اپنے کاروبار کے توسیع کے لیے 901 ملین روپے کی سرمایہ کاری جمع کی گئی ہے۔

دو روزہ بک بلڈنگ کے عمل کے دوران شیئر کی قیمت فلور پرائس 14 روپے سے تقریباً 29 فیصد بڑھ کر 18.02 روپے تک پہنچ گئی، اس عمل کے دوران شیئر کی قیمت فلور پرائس سے زیادہ سے زیادہ 50 فیصد بڑھ کر 21 روپے تک جا سکتی تھی۔

بزنس ریکارڈر سے بات کرتے ہوئے شاہد علی حبیب سی ای او، عارف حبیب لمیٹڈ ( اے ایچ ایل ) جو کہ اس ابتدائی عوامی پیشکش ( آئی پی او ) کے لیے مرکزی بک رنر تھی نے کہا کہ کمپنی نے جمعہ کو دو روزہ بک بلڈنگ کے اختتام پر 37.5 ملین شیئرز (50 ملین شیئرز میں سے 75 فیصد) فروخت کر کے 675.75 ملین روپے جمع کیے۔

شریعہ کے مطابق خاندانی انشورنس فراہم کرنے والی کمپنی باقی 1 کروڑ 25 لاکھ شیئرز (50 ملین شیئرز کا 25 فیصد) ریٹیل سرمایہ کاروں کو 18.02 روپے فی شیئر کے اسٹرائیک پرائس پر فروخت کرے گی جس سے کمپنی کو مزید 22 کروڑ 52 لاکھ 50 ہزار روپے حاصل ہوں گے۔ انہوں نے کہا، یوں کمپنی کے مطابق آئی پی او کے ذریعے مجموعی طور پر 90 کروڑ 10 لاکھ روپے حاصل ہوں گے۔

پی کیو ایف ٹی ایل کے پریس بیان میں کہا گیا کہ آئی پی او کی بُک بلڈنگ 3.2 گنا زائد طلب کے ساتھ مکمل ہوئی جو پاکستان اسٹاک ایکسچینج میں کسی بھی خالص خاندانی تکافل کمپنی کا پہلا آئی پی او ہے۔

یہ پاکستان کے اسلامی انشورنس (تکافل) سیکٹر میں بھی اپنی نوعیت کا پہلا آئی پی او تھا، حبیب نے بتایا جو کمپنی اور اس کی مضبوط بنیادوں پر مارکیٹ کے پختہ اعتماد کی عکاسی کرتا ہے۔

آئی پی او سے حاصل ہونے والی رقم پی کیو ایف ٹی ایل کو سرمائے کی ضروریات پوری کرنے، ڈیجیٹل چینلز کے فروغ اور صارفین پر مبنی نئے تکافل مصنوعات کی ترقی میں مدد دے گی۔

بیان کے مطابق پی کیو ایف ٹی ایل پاکستان کی پہلی اور سب سے بڑی خالص خاندانی تکافل آپریٹر ہے جو مجموعی فیملی تکافل مارکیٹ کا 44 فیصد اور خالص خاندانی تکافل کے حصے کا 90.47 فیصد رکھتی ہے۔ کمپنی ملک کے کُل لائف انشورنس بزنس میں 6.6 فیصد حصہ بھی رکھتی ہے۔

ملک بھر میں سیلز نیٹ ورک پر مشتمل 73برانچز اور 1971فیلڈ نمائندوں کے ساتھ پاک قطر فیملی تکافل ذاتی سرمایہ کاری اور تکافل سلوشنزپیش کرتی ہے۔ پاک قطر فیملی تکافل نے بینک برانچز اور ڈیجیٹل پلیٹ فارمز کے ذریعے تحفظ سلوشنز فراہم کرنے کیلئے 14کلیدی بینکوں کے ساتھ اسٹریٹجک شراکت داری بھی کی ہے۔