اسلام آباد ایئرپورٹ پر حادثہ سے بچنے کا دعوی مسترد، ایئرپورٹس اتھارٹی نے وضاحت کردی

پاکستان ایئرپورٹس اتھارٹی (پی اے اے) نے بدھ کے روز ان رپورٹس کو مسترد کر دیا جن میں دعویٰ کیا گیا تھا کہ اسلام آباد انٹرنیشنل ایئرپورٹ پر ایک حادثہ ہوتے ہوتے رہ گیا، اور میڈیا سے اپیل کی کہ معمول کی ایوی ایشن کارروائیوں کو سنسنی خیز انداز میں پیش کرنے سے گریز کیا جائے۔

اس سے قبل متعدد میڈیا اداروں نے رپورٹ کیا تھا کہ جدہ سے اسلام آباد آنے والی سعودیہ ایئرلائن کی پرواز ایس وی 278 ایک بڑے حادثے سے بال بال بچ گئی کیونکہ ایئر ٹریفک کنٹرولر نے پائلٹ کو غلط رن وے پر طیارہ اتارنے سے روک دیا تھا۔

پی اے اے نے اپنی پریس ریلیز میں کہا کہ اسلام آباد انٹرنیشنل ایئرپورٹ پر پرواز ایس وی 728 کے ساتھ پیش آنے والا حالیہ گو اراؤنڈ ایک معمول کا اور عالمی سطح پر تسلیم شدہ حفاظتی اقدام تھا، جسے طے شدہ پروٹوکول کے عین مطابق انجام دیا گیا۔

اتھارٹی کے مطابق گو اراؤنڈ ایک عام اور غیر ہنگامی کارروائی ہے جو آپریشنل سیفٹی کی بلند ترین سطح کو یقینی بنانے کے لیے کی جاتی ہے۔

بیان میں کہا گیا کہ سنسنی خیز رپورٹنگ غیر ارادی طور پر مسافروں میں غیر ضروری تشویش پیدا کر سکتی ہے اور معمول کی ایوی ایشن سرگرمیوں کے بارے میں غلط فہمیوں کو جنم دے سکتی ہے۔

اتھارٹی نے مزید کہا کہ وہ عوام کو باخبر رکھنے میں میڈیا کے کردار کو ایک اہم شراکت دار کے طور پر قدر کی نگاہ سے دیکھتی ہے اور ذمہ دارانہ رپورٹنگ کی حوصلہ افزائی کرتی ہے جو تصدیق شدہ معلومات پر مبنی ہو۔

پی اے اے نے واضح کیا کہ وہ شفافیت اور پاکستان کے تمام ہوائی اڈوں پر بلند ترین حفاظتی معیار کو برقرار رکھنے کے لیے پرعزم ہے۔