یورپی یونین کے سفیر کا وفاقی چیمبر کا دورہ، اقتصادی تعلقات مزید مضبوط بنانے پر اتفاق

فیڈریشن آف پاکستان چیمبرز آف کامرس اینڈ انڈسٹری کے صدر عاطف اکرام شیخ نے بتایا ہے کہ پاکستان میں تعینات یورپی یونین کے سفیر ہینڈے ریمونڈس کاروبلس نے سینئر حکام کے ہمراہ ایف پی سی سی آئی کا اہم دورہ کیا، جہاں پاکستان اور یورپی یونین کے درمیان اقتصادی تعلقات مزید مضبوط بنانے، باہمی تجارت بڑھانے اور سرمایہ کاری کے نئے مواقع پیدا کرنے کے حوالے سے تفصیلی مذاکرات ہوئے۔

عاطف اکرام شیخ کے مطابق پاکستان اور یورپی یونین گزشتہ 60 برس سے مضبوط سفارتی، معاشی اور تجارتی تعلقات کے حامل ہیں اور اسی تناظر میں اسلام آباد میں یورپی یونین۔پاکستان بزنس فورم پہلی مرتبہ 28 اور 29 اپریل 2026 کو منعقد ہو رہا ہے جس کا افتتاح وزیرِاعظم میاں محمد شہباز شریف کریں گے۔

انہوں نے کہا کہ یہ تاریخی فورم یورپی یونین، اس کے رکن ممالک اور حکومتِ پاکستان کے اشتراک سے منعقد ہو رہا ہے،جس کا مقصد کاروباری شراکت داری کو فروغ دینا، سرمایہ کاری کے نئے دروازے کھولنا اور دونوں خطوں کے نجی شعبے کو قریب لانا ہے۔

عاطف اکرام شیخ نے کہا کہ یورپی یونین پاکستان کا ایک اہم ترین تجارتی شراکت دار ہے اور جی ایس پی پلس کا تسلسل پاکستان کی برآمدات میں نمایاں اضافے کا باعث بنا ہےانہوں نے کہا کہ ایف پی سی سی آئی یورپی سرمایہ کاروں کی بھرپور معاونت کرے گا اور قابلِ تجدید توانائی، ٹیکنالوجی، ٹیکسٹائل ویلیو ایڈیشن، زرعی پروسیسنگ اور لاجسٹکس میں مشترکہ سرمایہ کاری کے منصوبوں کو فروغ دیا جائے گا۔

اس موقع پر یورپی یونین کے سفیر ریمونڈس کاروبلس نے کہا کہ پاکستان یورپی یونین کا نہایت اہم شراکت دار ہے اور ایف پی سی سی آئی بطور قومی تجارتی و صنعتی ادارہ کلیدی کردار ادا کررہا ہے۔

انہوں نے کہا کہ یورپی یونین پاکستان کی پائیدار معاشی ترقی کے لیے جی ایس پی پلس، سماجی و ماحولیاتی تعاون اور عوامی روابط کے فروغ پر اپنے تعاون کا سلسلہ جاری رکھے گا۔

کاپی رائٹ بزنس ریکارڈر 2025