صدر زرداری دوحہ میں دوسری عالمی سماجی سربراہی کانفرنس میں شرکت کریں گے

صدر آصف علی زرداری 4 سے 6 نومبر تک دوحہ قطر میں منعقد ہونے والی دوسری عالمی سماجی ترقی سربراہی کانفرنس میں شرکت کریں گے، جو اقوامِ متحدہ کی جنرل اسمبلی کے زیرِ اہتمام ہو رہی ہے۔

ایوانِ صدر کی جانب سے جاری بیان میں کہا گیا کہ صدر زرداری اس موقع پر پاکستان کے جامع معاشی ترقی، سماجی تحفظ اور ماحول دوست روزگار کے عزم کو اجاگر کریں گے اور عالمی رہنماؤں سے اہم ملاقاتیں کریں گے۔

پاکستان پیپلز پارٹی (پی پی پی) میڈیا سیل کے مطابق یہ سربراہی اجلاس دنیا بھر کے رہنماؤں اور پالیسی سازوں کو ایک پلیٹ فارم پر جمع کرے گا , تاکہ سماجی ترقی کو فروغ دینے، باعزت روزگار کے مواقع پیدا کرنے اور جامع حفاظتی نظام کو مضبوط بنانے کے طریقوں پر تبادلہ خیال کیا جا سکے۔

بیان میں مزید کہا گیا کہ صدر مملکت اجلاس کے موقع پر قطر کی قیادت، اقوامِ متحدہ اور دیگر بین الاقوامی تنظیموں کے سربراہان سمیت متعدد عالمی و علاقائی رہنماؤں سے بھی ملیں گے۔

صدر زرداری اس موقع پر پاکستان کے سماجی تحفظ اور جامع ترقی کے عزم کو اجاگر کریں گے، خاص طور پر بینظیر انکم سپورٹ پروگرام (بی آئی ایس پی) کے کردار پر روشنی ڈالیں گے جو ملک میں غربت میں کمی اور کمزور طبقات کی بحالی کے لیے اہم ستون ہے۔

بیان کے مطابق دوحہ سے منسلک سوشل پروٹیکشن اینڈ جابس کمپیکٹ (2026-28) کے آغاز کے لیے پاکستان تیار ہے، جس کا مقصد غیر رسمی شعبے کے کارکنوں، معذور افراد اور بچوں تک سماجی تحفظ کی رسائی کو بڑھانا اور باعزت روزگار و ماحول دوست (سبز) ملازمتوں کے فروغ کو یقینی بنانا ہے۔

یہ اقدام قومی ترقیاتی منصوبوں، دوحہ سیاسی اعلامیے اور سماجی تحفظ سے متعلق عالمی اہداف کے ساتھ ہم آہنگ ہے۔

صدر زرداری اس بات پر بھی زور دیں گے کہ پاکستان ترقیاتی شراکت داروں اور عالمی مالیاتی اداروں کے ساتھ قریبی تعاون کا خواہاں ہے ،تاکہ سماجی تحفظ اور سبز روزگار کے لیے فنڈز کو متحرک کیا جا سکے۔

اس مقصد کے لیے وہ پائیدار ترقی کے اہداف (ایس ڈی جی) کے مالیاتی منصوبے، قرض کے بدلے سماجی یا ماحولیاتی ترقی کے معاہدوں اور چین کے گلوبل ڈویلپمنٹ انیشی ایٹو کے تحت جنوبی ،جنوب تعاون جیسے طریقہ کار پر بات کریں گے۔

صدر دوحہ سربراہی اجلاس کے نتائج کو عملی اقدامات میں تبدیل کرنے کے پاکستان کے عزم کا اعادہ کریں گے ،تاکہ سماجی تحفظ کے نظام کو مزید مؤثر بنایا جا سکے اور پائیدار و جامع معاشی ترقی کو فروغ دیا جا سکے۔