فلوٹیلا کیخلاف اسرائیلی کارروائی، پاکستان کی شدید مذمت، بین الاقوامی قوانین کی کھلی خلاف ورزی قرار دیدیا

پاکستان نے جمعرات کو گلوبل صمود فلوٹیلا کو روکنے کی سخت مذمت کی اور کہا کہ یہ اسرائیل کی جانب سے بین الاقوامی قانون اور انسانی قوانین کی ایک اور کھلی خلاف ورزی ہے۔

دفتر خارجہ (ایف او) کی جانب سے جاری بیان میں کہا گیا کہ یہ قابل مذمت اقدام اسرائیل کی مسلسل جارحیت اور غزہ کی غیر قانونی ناکہ بندی کا حصہ ہے، جس نے 20 لاکھ سے زائد فلسطینیوں کو شدید انسانی مشکلات اور محرومیوں میں مبتلا کر رکھا ہے۔

بیان میں کہا گیا کہ انسانی امداد کو جان بوجھ کر روکنا قابض طاقت کے طور پر اسرائیل کی ذمہ داریوں کی سنگین خلاف ورزی ہے، جو کہ چوتھے جنیوا کنونشن کے تحت لازم ہیں۔

بدھ کے روز اسرائیلی بحری افواج نے گلوبل صمود فلوٹیلا کو روکا، جس میں تقریباً 45 جہاز شامل تھے، جن پر سیاستدان اور کارکنان سوار تھے، جن میں سویڈن کی ماحولیاتی کارکن گریٹا تھنبرگ بھی شامل تھیں۔ یہ قافلہ گزشتہ ماہ اسپین سے روانہ ہوا تھا اور اس کا مقصد فلسطینی علاقے کی اسرائیلی ناکہ بندی کو توڑنا تھا، جہاں اقوام متحدہ کے مطابق قحط کی صورتحال پیدا ہو چکی ہے۔

فلوٹیلا کے بیان کے مطابق غزہ کے وقت کے مطابق شام 8 بجکر 30 منٹ پر (1730 جی ایم ٹی) اسرائیلی قابض افواج بین الاقوامی پانیوں میں الما، سیریس اور ادارا سمیت گلوبل صمود فلوٹیلا کے کئی جہازوں کو غیر قانونی طور پر روک کر سوار ہوگئیں۔

بیان میں مزید کہا گیا کہ اس تصدیق شدہ کارروائی کے علاوہ کئی دیگر جہازوں کے ساتھ براہِ راست نشریات اور رابطہ منقطع ہو گیا ہے۔

دریں اثناء دفتر خارجہ نے ایک بار پھر مطالبہ کیا کہ تمام مقبوضہ فلسطینی علاقوں میں فوری، غیر مشروط اور مستقل جنگ بندی کی جائے؛ غزہ کی غیر قانونی ناکہ بندی ختم کی جائے؛ فلسطینی عوام تک انسانی امداد کی بلا روک ٹوک فراہمی یقینی بنائی جائے؛ فلوٹیلا پر سوار تمام انسانی کارکنان اور سرگرم کارکنان کو فوراً رہا کیا جائے؛ بین الاقوامی قانون، بشمول انسانی قوانین اور انسانی حقوق کے قوانین کا مکمل احترام کیا جائے؛ اور اسرائیل کی جانب سے بار بار ہونے والی ان خلاف ورزیوں پر جوابدہی یقینی بنائی جائے۔

بیان میں پاکستان نے فلسطینی عوام کے ساتھ اپنی غیر متزلزل حمایت اور یکجہتی کا اعادہ بھی کیا۔

یہ فلوٹیلا غزہ کی ناکہ بندی کے خلاف مزاحمت کی سب سے نمایاں علامت بن گیا ہے۔

اس کا بحیرہ روم کے ذریعے سفر عالمی توجہ کا مرکز بنا رہا، جس کے دوران ترکیہ، اسپین اور اٹلی سمیت کئی ممالک نے اپنی کشتیوں اور ڈرونز کو تیار رکھا تاکہ ضرورت پڑنے پر اپنے شہریوں کی مدد کی جا سکے، جبکہ اسرائیل نے بار بار انہیں واپس لوٹنے کی وارننگ دی۔