کمپیٹیشن کمیشن نے پی ٹی سی ایل کو ٹیلی نار پاکستان اور اورین ٹاورز کے حصول کی منظوری دیدی

پاکستان ٹیلی کمیونیکیشن کمپنی لمیٹڈ (پی ٹی سی ایل) نے بدھ کے روز اعلان کیا کہ کمپیٹیشن کمیشن آف پاکستان (سی سی پی) نے ٹیلی نار پاکستان بی وی اور اورین ٹاورز پرائیویٹ لمیٹڈ کے مجوزہ حصول کی منظوری دے دی ہے۔

نوٹیفکیشن میں کہا گیا کہ یہ اطلاع دی جاتی ہے کہ یکم اکتوبر 2025 کو سی سی پی نے کمپیٹیشن ایکٹ 2010 کی دفعہ 11 کی ذیلی شق (2) اور کمپیٹیشن (مرجر کنٹرول) ریگولیشنز 2016 کے ریگولیشن 6 کے تحت پی ٹی سی ایل اور ٹیلی نار پاکستان بی وی کی جانب سے جمع کرائی گئی قبل از انضمام درخواست پر فیز-ٹو آرڈر جاری کیا ہے، جس کے ذریعے اس لین دین کی منظوری دی گئی ہے۔“

تاہم، پی ٹی سی ایل نے وضاحت کی کہ اس سودے کو حتمی شکل دینا ابھی باقی ہے کیونکہ یہ دیگر کارپوریٹ اور ریگولیٹری منظوریوں، رسمی کارروائیوں، ضروری معاہدوں/دستاویزات پر دستخط اور پابندیوں کی ذمہ داریوں کی تکمیل سے مشروط ہے۔

پی ٹی سی ایل نے ایک علیحدہ بیان میں کہا کہ وہ سی سی پی کا مشکور ہے کہ اس نے ٹیلی نار پاکستان کے حصول کے عمل کی فیز ٹو جانچ کامیابی سے مکمل کی۔

بیان کے مطابق ہم سی سی پی کے اس جامع عمل کی دل سے تعریف کرتے ہیں جس نے پاکستان کے ٹیلی کام سیکٹر کے مستقبل کے تناظر اور طویل مدتی پائیداری کو محفوظ بنایا۔ ہم اپنے صارفین، پارٹنرز اور وسیع ٹیلی کام کمیونٹی کے بھی شکر گزار ہیں جو اس تاریخی اعلان کے منتظر تھے۔

ٹیلی کام کمپنی نے کہا کہ اس نے پورے ریویو عمل کے دوران کمیشن کے ساتھ مکمل تعاون کیا اور یہ وعدہ کیا کہ حصول کے عمل کو تمام ریگولیٹری اداروں کی ہدایات کے مکمل ہم آہنگی کے ساتھ آگے بڑھایا جائے گا۔

پی ٹی سی ایل نے مزید کہا کہ یہ انٹرا-سیکٹر انضمام پاکستان کے ٹیلی کام انڈسٹری کے لیے ایک فیصلہ کن قدم ہے، جو پی ٹی ایم ایل (یوفون) اور ٹیلی نار دونوں کی طاقتوں کو یکجا کر کے صارفین کو بہترین خدمات، بہتر نیٹ ورک معیار، وسیع تر کوریج اور جدید ڈیجیٹل سہولیات فراہم کرے گا، جبکہ سیکٹر کو زیادہ کارکردگی، مضبوط انفراسٹرکچر اور زیادہ مسابقتی ماحول فراہم کرنے کے قابل بنائے گا۔

مزید برآں، یہ انضمام ملک گیر کنیکٹیویٹی کو مضبوط کرے گا، جدت کو فروغ دے گا اور حکومت کے ڈیجیٹلی بااختیار پاکستان کے وژن کی معاونت کرے گا۔

سی سی پی نے اپنی تاریخ میں سب سے جامع مرجر ریویوز میں سے ایک کیا، جس میں یہ جانچنے کے لیے سبسٹینشل لیسینگ آف کمپیٹیشن (ایس ایل سی) ٹیسٹ استعمال کیا گیا کہ آیا یہ لین دین مارکیٹ ڈائنامکس کو مسخ کرے گا یا نہیں۔ کئی ذیلی مارکیٹس کا جائزہ لیا گیا، جن میں سیلولر موبائل آپریٹرز، لانگ ڈسٹنس اینڈ انٹرنیشنل (ایل ڈی آئی) سروسز، فکسڈ لائن، لیزڈ لائنز اور آئی پی بینڈوڈتھ شامل ہیں۔

ستمبر 2024 سے اگست 2025 کے درمیان، سی سی پی نے کم از کم پانچ اوپن ہیرنگز اور کئی خفیہ سیشنز پی ٹی سی ایل، ٹیلی نار اور دیگر اسٹیک ہولڈرز کے ساتھ منعقد کیے۔ کمیشن نے غلبے کے خدشات کا جائزہ لینے کے لیے ریگولیٹری علیحدہ اکاؤنٹس، انٹرکنیکشن معاہدے اور بزنس پلانز سمیت وسیع ڈیٹا طلب کیا۔

بار بار تاخیر، نامکمل انکشافات اور تکنیکی پیچیدگیوں کے باوجود، سی سی پی نے متعلقہ فریقین سے وضاحتیں طلب کرنا جاری رکھا، یہاں تک کہ اسے درکار معلومات موصول ہو گئیں۔